Иванов: Дипломатите без бирократски стеги

Македонскиот претседател лично го информираше шефот на дипломатијата за своите иницијативи

Одликувања за заслужни странски амбасадори, но и дебирократизирање на македонската дипломатија, вчера како иницијативи ги поведе претседателот Ѓорге Иванов за време на посетата на нашето Министерство за надворешни работи и средбата со шефот на дипломатијата Антонио Милошоски. Иванов на средбата повел иницијатива за дебирократизирање на македонските амбасадори и дипломати. Тој притоа апелирал за зголемување на слободата во дејствувањето на македонските амбасадори со паралелно зголемување на одговорностите по кои и ќе бидат оценувани. Иванов притоа најавил поригорозна анализа и оценување на работата на амбасадорите следејќи ги критериумите за јавна дипломатија, промовирање на македонското стопанство и економската соработка, но и промоција на културните вредности.

Иницијативата на Иванов за одликувањата, пак, е во насока на оддавање признание на странските амбасадори по завршувањето на нивниот мандат во земјава, а кои покажале исклучителен ангажман и значаен придонес во унапредувањето на билатералните односи. Новото одликување би било сосема нов тип одликување што не е предвидено со постојните ордени и одликувања кои се третираат со Закон за одликувања и признанија.

Иванов при посетата на МНР им одржа и предавање на младите дипломати на тема „Дваесет години македонска независна дипломатија“. (Т.Г.)