Граѓаните бараат поредовно подигнување на селектираниот отпад
Наместо комуналците, Ромите редовно ги собираат хартијата и ПЕТ- пластиката
Жителите од населбата Тафталиџе се жалат дека „Комунална хигиена“ редовно не го подигнува селектираниот отпад, два пати во месецот, како што беше најавено во почетокот на акцијата. Граѓаните велат дека веќе подолг период не ги забележуваат возилата на комуналците со кои се собираат хартијата и ПЕТ- пластиката секој втор четврток и петок. Но затоа, пак, Ромите кои вршат дива селекција на отпадот им се редовни гости во дворовите. Во „Комунална“ нагласуваат дека акцијата се одвива според утврдената динамика и без застој, двапати во месецот во утврдените термини.
„Не знам дали кесите со пластика и хартија да ги чувам дома или во двор, бидејќи неколку пати во текот на неделата доаѓаат Ромите и ми пребаруваат во ѓубрето. Од друга страна, пак, се случува да поминат две недели, а комуналците да не дојдат да го подигнат отпадот“, вели жителка на Тафталиџе 2. Таа нагласува дека истиот проблем го имаат и нејзините соседи на повеќе улици во околината, кои, за да се ослободат од отпадот, им го оставаат на Ромите, а некои, пак, едноставно го фрлаат со другиот комунален смет.
Жителите на населбата упатуваат апел до „Комунална хигиена“ поредовно да го собира селектраниот отпад, за да не се заборави новостекнатата навика на граѓаните за селекција на ѓубрето. Во претпријатието велат дека немаат некои посериозни проблеми и оти со мали пропусти акцијата се одвива со нормално темпо. Тие им советуваат на граѓаните отпадот да го оставаат во дворовите секој втор четврток и петок од 11 до 17 часот, кога поминуваат нивните екипи. Доколку се појават дополнителни проблеми, граѓаните можат да ги пријават на дежурниот телефон на јавното претпријатие 3216- 644. (С.Н.)
|
