Насловна

Стариот лидер нова надеж за СДСМ

Социјалдемократите бараат одговори зошто опозицијата поминала толку лошо во руралните средини

Александра М. Митевска

Битола - Многу дискусии, ама без искричења - во таква атмосфера вчера помина првиот дел од Конгресот на СДСМ во Битола, на кој се решаваше за довербата на членството во партиските органи, пред се', во лидерот Бранко Црвенковски по изборите на 5 јуни.

До затворањето на овој број на весникот, не беше завршено гласањето на околу 550 делегати што дојдоа на Конгресот (биле поканети околу 700 делегати). Сепак, расположението од Домот на културата во Битола јасно навести дека не треба да се очекуваат изненадувања, односно дека Црвенковски останува на партиското кормило.

Целиот Конгрес се одвиваше зад затворени врати, но, според брифинзите од партиски функционери, се водела „конструктивна расправа“, во која било искажано задоволство од изборниот резултат, ама и таму критично било заклучено дека тој резултат не донесе смена на власта. Поради тоа, се начнала и дискусија околу тоа ��ои треба да бидат потезите на СДСМ во иднина.

Според непотврдени информации, имало и размислувања за проширување на опозицискиот фронт со граѓански здруженија и со партии што останаа надвор од парламентот, како, на пример ЛДП. Наводно, било спомнато и дека треба да се размислува за мешана коалиција со партија од албанскиот блок за да се надмине прагот од 450.000 гласа што станаа неопходни за изборна победа. За дискусија се јавиле 15-ина делегати. Доминирале тезите дека во изминатите две години најголемата опозициска партија се консолидирала и дека во иднина треба да се зачува единството.

Било речено дека за проблемите треба да се расправа внатре во партијата, а не преку медиумите. Тоа, всушност, е порака до поранешниот лидер Владо Бучковски, кој преку медиумите се залагаше за сериозна анализа за причините за изборниот пораз. Бучковски присуствуваше на вчерашниот Конгрес само како гостин.

Анализирајќи ги кампањата и резултатот од изборите социјалдемократите меѓу другото заклучиле дека опозицијата поминала најлошо во руралните средини, додека во многу урбани центри бил постигнат резултат што ги надминал и најоптимистичките очекувања. За социјалдемократите е изненадување што слабо поминале во руралните средини каде што живеат најсиромашните слоеви. Процените се дека причина за тоа се субвенциите што ги подели Владата пред изборите, како и тоа што кај тие категории граѓани полесно поминува популизмот на Владата. Било заклучено и дека е добро што на изборите имаше голем одѕив и дека тоа е знак дека граѓаните го надминале стравот.

„И ние самите бевме изненадени од позитивниот резултат што го постигнавме на изборите. Ретко некој очекуваше дека ќе освоиме дури 370.000 гласа. Со тоа се демантираат тврдењата дека власта стагнира но и дека опозицијата не се поправа“, вели висок функционер на СДСМ. Според него, терминот во кој се закажаа изборите не е одговорност на СДСМ, бидејќи опозицијата немала контрола на изборниот датум.

Од вонредниот Конгрес не произлегоа појасни насоки за тоа како ќе дејствува опозицијата во наредниот период. Новата стратегија ќе биде следна задача за Црвенковски и за раководството на СДСМ откако сопартијците покажаа дека се' уште им веруваат.

Доверба за промени

„Да гласаме доверба за да ни се случат промени“. Така им се обратила на сопартијците Радмила Шеќеринска, која на изборите беше кандидат на СДСМ за премиер. Таа рекла дека СДСМ сега има обврска кон неговите поддржувачи, но и дека обврска на партијата е да придобие уште нови гласачи. Нејзината дискусија се оценува како конструктивна. И таа се заложила за единство во партијата.

Градоначалникот на Струмица, Зоран Заев, исто така искажал поддршка за раководството и за натамошно единство во СДСМ. Сепак, тој забележал дека премногу акцент се ставило на Скопје, а дека од главниот град СДСМ инкасирал само 100.000 гласа. Поради тоа, Заев се заложил во иднина СДСМ да обрне внимание на внатрешноста на државата. (А.М.М.)

Црвенковски верува во идни победи

„На овие избори не победивме, туку доживеавме пораз. Јас ја преземам одговорноста за тоа“, рекол лидерот на СДСМ, Бранко Црвенковски, со чија дискусија заврши првиот дел од Конгресот. Тој рекол дека по неговото враќање во партијата атмосферата во СДСМ се подобрила. „Убеден сум дека на следните локални избори (во 2013 година) СДСМ ќе победи“, рекол Црвенковски. (А.М.М.)