РОНИ ВУД

Скапо платен развод

Гитаристот на „Ролингстоунс“, Рони Вуд, скапо го платил разводот од својата сопруга Џо, која добила половина од неговото богатство, во износ од 17 милиони долари, како и семејната куќа во Кингстон Вејл, чија вредност се проценува на 19 милиони долари.

Покрај сето ова, Рони на својата сега веќе бивша сопруга ќе мора да и' плаќа месечна алиментација. Рони и Џо беа во брак 23 години и имаат две деца - Лија и Тајрон. До распад на бракот дојде откако Вуд започна романса со дваесетгодишната келнерка Екатерина Иванова.

„Не ни сонував дека ќе ми го направи тоа. И покрај се', ќе останеме пријатели, зашто многу нешта преживеавме заедно“, изјавила Џо Вуд.

Рони ја запознал младата келнерка кон крајот на минатата година во еден бар, а набрзо започнаа љубовна врска. Иако неговата тогашна сопруга мислела дека е во прашање минлива афера, Рони набрзо ја повикал Катерина да живее со него во заедничкиот апартман. Џо Вуд тогаш поднела барање за развод, а преговорите за делба на имотот траеја осум месеци.