Ѓоко Танески вечерва ќе пее 15-ти

Македонија ќе настапи на првата полуфинална вечер, борејќи се за пласман во финалето резервирано за 29 мај

Македонскиот претставник Ѓоко Танески вечерва ќе настапи во првата полуфинална вечер на Изборот на песна за Евровизија што се одржува од 25 до 29 мај во Осло, Норвешка. Танески со темата „Јас ја имам силата“ (Кристијан Габроски/Дарко Тасев) од фантастичната 15. позиција ќе се обиде да се избори за влез во финалето резервирано за в сабота, 29 мај. Непосредно пред заминувањето за Норвешка, Ѓоко изјави дека е оптимист и оти е сигурен дека ќе влезе меѓу најдобрите на главната вечер. Негови ривали во првото полуфинале се претставниците на Молдавија, Русија, Естонија, Словачка, Финска, Летонија, Србија, Босна и Херцеговина, Полска, Белгија, Малта, Албанија, Грција, Португалија, Белорусија и Исланд.

Нашиот евровизиски адут во изминатите денови одржа две технички проби на сцената во арената „Теленор“, две прес-конференции и успешно организирана македонска вечер. Друштво на сцената вечерва ќе му прават раперот Били Ѕвер и две, односно три танчерки, Јана Андреевиќ, Мартина Србиновска и Дејана Николовска, која е и придружен вокал. Нивниот финален изглед може да го видите на фотографијата - Ѓоко ќе се појави во елегантен црн костум, раперот ќе биде облечен во сив, а танчерките ќе бидат поразголени. Танески во Осло ќе пее на македонски јазик.

За најдобрите ќе се одлучува по пат на телевоутинг и со жири-комисија на принципот 50-50, а десетте најдобро пласирани песни ќе добијат виза за настап во финалето.

Годинешниот избор во Осло се одржува под слоганот „Сподели го моментот“, а се очекува да го следат околу 125 милиони луѓе низ цел свет. (К.Ш.)