Претходен број

Заев ќе го води СДСМ до доаѓањето на Црвенковски

Струмичкиот градоначалник и потпретседател на СДСМ, Зоран Заев, на прексиноќешната седница на Извршниот одбор едногласно е именуван за в.д. претседател на најголемата опозициска партија. В среда, оваа одлука се очекува да ја потврди и Централниот одбор на СДСМ, а Заев ќе раководи со партијата во наредните девет месеци, односно до изборниот конгрес кога на лидерската позиција се очекува враќање на шефот на државата, Бранко Црвенковски, кому тогаш му завршува претседателскиот мандат.

На седницата на ИО изостанале дискусиите околу повлекувањето на лидерката на СДСМ, Радмила Шекеринска, бидејќи одлуката за повлекување од функцијата, која ја најави веднаш по поразот на парламентарните избори, ја поткрепи со неотповиклива оставка. Сега, од вкупно четири органи на СДСМ, два се во оставка - претседателката и генералниот секретар Горан Минчев.

Сепак, иако Зоран Заев има кус мандат во кој објективно не може да направи којзнае какви пресврти во партијата, од него се очекуваат најмалку три работи - опозицискиот СДСМ на претстојните локални избори достоинствено да му се спротивстави на ВМРО-ДПМНЕ и да оствари пристоен изборен резултат, но и да го подготви изборниот партиски конгрес во мај.

Главната причина за кризата во СДСМ и генерално во опозицијата, Заев, како што рече вчера во Струмица, ја гледа во огромните поделби и раслојувањето на партијата, како и во немањето чувство дека единството е неопходен предуслов за добри перспективи на секоја политичка партија. Идниот в.д. претседател не крие дека за 6-7 месеци не може да се направи нешто многу, но „како партија ќе се потрудиме секој месец да го искористиме за едно скалило плус да го надградиме нашиот рејтинг. Свесни сме дека тоа е едноставно за кажување, но многу е тешко за да биде створено. Она што во иднина треба да се случи е само добра основа, основа на единство кое и' е неопходно на партијата, ако воопшто сакаме да размислуваме СДСМ да се врати на местото кое му доликува“.

Прашан дали прифаќањето да раководи со СДСМ во временски ограничен рок е своевидно оддолжување за аболицијата добиена од претседателот Црвенковски, Заев категорично одговара: „Сигурно не. Ова е само потврда на моите заложби за реализација на концептот за подобра Македонија, во кој никој не успеа да ме обесхрабри“.

Струмичкиот градоначалник не смета дека сегашната функција ќе му пречи во извршувањето на новите обврски, туку е убеден дека искуството од локалната власт може добро да го искористи и во раководењето со СДСМ. „Секогаш ќе бидам онаму каде што сум потребен. Денот има 24 часа кои се доволни за извршување на двете функции“, вели Заев. (Б.Ј.-Е.П.)