Нема веќе бесплатно копање на градските улици и тротоари

За прекопи до 100 метри, ќе се плаќа 15.000 денари, а за поголеми од 300 метри, 30.000 денари

Сања Наумовска


Прекопувањето на градските улици во иднина ќе се плаќа. Градот Скопје воведе нова давачка за компаниите и фирмите, кои доколку имаат потреба да поставуваат нови или да менуваат стари инсталации во сообраќајниците и покрај нив, ќе мора да го одврзат ќесето и да платат за секој направен прекоп. Со тоа се согласија и советниците во градскиот Совет. Давачки во иднина ќе имаат и товарните возила, кои со својата тежина, ширина и висина ги оптоваруваат улиците. Посебна комисија на Градот Скопје и јавните претпријатија ќе утврдува и пенали за секој учесник во сообраќајот што ќе предизвика штета на градска сообраќајница.

Новините во политиката за собирање средства за градскиот буџет, во локалната самоуправа ги оправдуваат со можностите што им ги нуди Законот за јавни патишта. Ниедна од овие давачки не се наплатувала досега, иако имало можности за тоа.

Во Градот велат дека нема да се откажат од ниеден извор на финансии што им е на располагање. Во таа насока, истовремено, зголемени се цените за рекламирање на билборди, сити-лајт, поставувањето банери и тотеми, како и рекламни паноа на градилишта, реклами на мостови и надвозници. Првпат во оваа област се воведува зонирање на градот, според атрактивноста на локацијата.

Според новата одлука, секој што попречно ќе прекопа градска улица, ќе мора да плати 6.000 денари. За надолжни прекопи до 100 метри ќе се плаќа 15.000 денари, а за поголеми од 300 метри, 30.000 денари. Прекумерното користење на градски пат, кој е, на пример, во близина на стопански субјекти што користат тешки товарни возила ќе се плаќа 600 денари месечно за секое возило. Товарните возила што ја пречекоруваат законски дозволената должина, ширина или висина, ако користат градски пат ќе мораат да платат 300 денари за еден изминат километар. Ако, пак, возилото ја пречекорува дозволената тежина, ќе се плаќа за секој дополнителен тон тежина.

Рекламирањето на билборди, сити-лајт и други рекламни паноа отсега ќе се дели на комерцијални и за сопствени потреби, одлучија градските советници. Разлика ќе има во цената, која ќе се движи од 150 до 200 денари за квадратен метар, во зависност од зоната во која се наоѓа билбордот. За разлика од рекламирањето за сопствени потреби, поскапо ќе биде истакнувањето реклама за друга фирма.