Претходен број

Штрајкот прекинат, Владата позадоволна од СОНК

Лидерот на СОНК Дојчин Цветановски

Премиерот Груевски му се заблагодари на СОНК што направил сериозни отстапки во барањата до Владата

Жаклина Хаџи-Зафирова

Основците и средношколците вчера се вратија на настава, откако завчеравечер Владата и СОНК потпишаа спогодба, со што се стави крај на деветдневниот штрајк на просветарите придружен со многу притисоци и закани врз наставниците и децата да се одржи настава.

Премиерот Никола Груевски вчера му се заблагодари на СОНК што направил сериозни отстапки во барањата до Владата, која, генерално, ги прифати барањата на Синдикатот. Синдикалниот лидер Дојчин Цветановски вчера рече дека и стопроцентно да биле прифатени нивните барања, тој немало да биде задоволен.

Со прифаќањето на барањата, просветарите од јуни идната година ќе добијат зголемување на платата за 900 денари кој ќе им се дава како надомест за храна. Наместо како што се бараше до крајот на јануари да се трансформира работниот однос на наставниците од определено на неопределено време, тоа ќе се реши до крајот на март. Поместувања во роковите има и кај колективните договори за основно и за средно, чија примена во делот на платите беше побарано да стартува од 1 јануари 2009 година, а ќе се одложи за една година.

Останува отворено прашањето дали и како ќе се надоместат изгубените часови на учениците, за што ќе одлучуваат Министерството за образование и СОНК. Од Државниот просветен инспекторат стигна предупредување дека надополнување на наставата мора да има, во спротивно ќе следуваат пријави. Во Инспекторатот се подготвуваат и пријави за оние наставници кои постапиле незаконски за време на штрајкот.

Премиерот Никола Груевски вчера изјави дека е задоволен што се завршила „целата мешаница и расправија“.

„Морам да го поздравам раководството на СОНК што на крајот одлучи да направи сериозни отстапки во своите барања разбирајќи ја целокупната ситуација во Македонија“, изјави премиерот, не сакајќи да коментира кој попуштил повеќе во преговорите. Тој не сакаше и да одговори дали ќе има казни во врска со штрајкот.

Потпишувањето на спогодбата следуваше по неколкучасовната средба на синдикалниот лидер Цветановски со министерот за образование, Перо Стојановски, министерката за култура Елизабета Канческа-Милевска и заменик-министерот за труд и социјала, Спиро Ристовски.

Министерот Стојановски изјави дека преговорите со СОНК траеле долго со цел да се најде вистинско решение. „Се дискутираше за сето она што беше пост��вено како дилема. Се бараше начин да се изнајде решение предвиденото во Колективниот договор да не биде на штета на просветните работници и на членовите на синдикатот“, рече министерот.

„Колективните договори за основно и за средно образование да се склучат веднаш, а во делот на платите примената да почне на 1 јануари 2010 година. Тоа значи дека ќе бидат потпишани сега, вечерва. Преговорите за колективните договори за дејноста згрижување и воспитување деца, потоа за високо образование и за наука и култура да почнат веднаш по склучување на оваа спогодба“, изјави Цветановски на средбата со Стојановски. Тој додаде дека со владините претставници се договориле овие преговори да завршат најдоцна до крајот на декември 2009 година.

Цветановски вчера не сакаше да прецизира каде попуштиле тие, а каде Владата, само појасни: „Прифатено е нашето барање за примена во делот на коефициентите на колективните договори, но не од јануари 2009, туку од 2010 година, затоа што претставниците на Владата не спомнуваа време за реализирање во делот за платите. Тоа значи меѓу нивниот тврд став - јануари 2010 година и нашето барање јануари 2009 година се најде компромис. Во случајот, седум месеци во текот на 2009 година платата на вработените ќе им се зголемува за 900 денари, почнувајќи од јуни“, рече Цветановски.

Во врска со третото барање за трансформација на работниот однос од определено на неопределено време на најмалку 8.000 наставници, претседателот на СОНК смета дека прилично е оптимистички ова прашање да се реши до март идната година.

Колективни договори се бараа и во времето на Бучковски

Колективните договори беа дел од барањата на СОНК и пред две години кога на чело на владата беше Владо Бучковски. Над 10 илјади вработени во образованието, културата и науката тогаш одржаа двонеделен протест, барајќи преговори за утврдување на минималната плата согласно колективните договори, како и утврдување на коефициентите според овие договори. Несогласувањата меѓу Владата и синдикалниот лидер Дојчин Цветановски завршија со потпишување спогодба, а се реши проблемот со исплатата на коефициентите на класните раководители, како и за изведување на целодневната настава. Претходно владата на Бучковски им предложи на СОНК зголемување на платите за пет отсто, тие не прифатија. Компромисот околу платата беше постигнат со тоа што и двете страни се согласија за зголемување на платите за еден отсто, што им беше исплаќано во период од дванаесет месеци.