Претходен број

ЛДП го повика Велјаноски да поднесе оставка

Спикерот нема да им ја исполни желбата, бидејќи „брзите“ закони се поврзани со финансиската криза

Оливера Војновска

Либералдемократите вчера го повикаа претседателот на Собранието, Трајко Велјаноски, да биде доблесен и да си замине од функцијата бидејќи, според нив, со сервилност однос кон Владата ја довел во понижувачка позиција институцијата на чие чело се наоѓа. ЛДП го обвини Велјаноски дека наспроти неговото извинување пред дипломатите, тој сега ја репризира јулската епизода, кога експресно беа усвоени околу 170 закони.

Спикерот веднаш им одговори дека нема да им ја исполни желбата. Како што појасни Велјаноски, законите не се по итна, туку по скратена постапка и дипломатите имале разбирање за тоа, бидејќи проектите се поврзани со мерките за финансиската криза.

Опозицијата вчера жестоко го критикуваше новиот начин на работа на парламентот. Законите по скратена постапка фактички поминуваат без дебата во Собранието, амандманската расправа се води во матичните комисии, а на пленарната седница само се гласа. Новиот Деловник - поточно примената на глава девет, вчера имаше премиера на измените на Законот за пензиско и инвалидско осигурување.

Опозиционерите едвај се изборија кога веќе не можат да дискутираат, барем да реплицираат. Најнапред Велјаноски тврдеше дека во случај на носење закони по скратена постапка, пратениците не можат да реплицираат. Но, откако атмосферата во собраниската сала зовре, за да ја смири ситуацијата, спикерот даде пауза на која власта и опозицијата, сепак, се договорија да има реплики.

Координаторот на пратеничката група на ЛДП, Андреј Жерновски, користејќи го правото на процедурална интервенција, изрази жалење што парламентот е целосно суспендиран. „За жал, веќе не го препознавам парламентот, ова не е истата институција кој според Уставот носи закони. Собранието е претворено во орган на заверување на проектите на Владата. Вие, господине Велјаноски, им се извинувавте на странските дипломати дека брзото носење закони беше грешка и ги убедувавте дека нема да се повтори тоа. Вашиот збор ништо не значи. Грешката е во тоа што вие сте претседател на Собранието и немате храброст на Владата да и' кажете дека парламентот не може да биде сервис на Владата. Не смее да се дозволи Владата да го јавне Собранието, како што се случи сега. Затоа е најдобро поскоро да си заминете од функцијата“, рече Жерновски.

Во репликата што следуваше Велјаноски кусо му одговори: „Веднаш да ви кажам дека нема да си заминам. Оние што ги споме��увате имаат разбирање за овие закони, бидејќи се однесуваат на финансиската криза. Во сите земји мерките за справување со кризата се носат што поскоро“.

Пратеникот од СДСМ, Андреј Петров, забележа дека по скратена постапка се предлагаат закони кои на ниту еден начин не се поврзани со финансиската криза. „По скратена постапка се предлага и зголемување на надоместокот на советниците во општините од 70 на 84 отсто, што нема никаква врска со светската економска криза“, забележа Петров. Неговиот партиски колега Марјанчо Николов смета дека со носењето на законите по скратена постапка власта сака да ја избегне дебатата во Собранието.