Се „запали“ телефонот за пријавување дупки
За три дена, пријавени се 120 дупки, а 20-ина граѓани барале веднаш да се закрпи оштетувањето кај пругата во Усје
Деспина Трајковска
Улиците во градов се како швајцарско сирење. Така барем може да се суди од досегашната акција на ЈП „Улици и патишта“- „пријави дупка“. За само три дена откако е дадена можност граѓаните телефонски да алармираат за уништен коловоз, на дежурниот телефон 15300 имало 200 јавувања. Голем дел од нив се однесувале за иста дупка, а граѓаните барале интервенција и за градски и за општински улици, иако од „Улици и патишта“, кои го реализираат проектот најавија крпење само на градските улици.
На стартот од акцијата дежурниот телефон го „запалила“ дупката кај пругата во Усје, чие крпење побарале дваесетина граѓани. Од тие причини од претпријатието направиле сефте токму со таа дупка.
„За таа дупка имаше околу 20 повици, исто како и за уште неколку дупки, како една на улицата ‘Самуилова‘. Од тие причини таа се најде прва на листата за санација, па така уште веднаш во саботата се зафативме со теренска работа. Засега на списокот имаме околу 50 дупки за санација, иако досега има околу 200 пријави. Дел од нив се повторуваат за иста дупка, околу 50 се однесуваат за дупки на градски улици, а речиси 70 за дупки што се на улици под надлежност на општините, па од тие причини не ги планираме за санација оти јасно напоменавме дека во акцијава се вклучени само градски улици. Единствено што можеме е да го испратиме списокот со детектираните дупки кај општинарите“, вели Синиша Ивановски, директор во „Улици и патишта“.
Тој не сака да коментира дали големата бројка пријавени дупки значи дека градските и општинските служби не водат постојана грижа за состојбата на улиците. Единствено, вели дека е сигурен оти во случајов екипите на „Улици и патишта“ навремено и професионално ќе си ја завршуваат работата.
Освен дупката во Усје, викендов по списокот на пријавени дупки теренците од „Улици“ крпеле и на улицата „Лазар Личеновски“, на булеварот „ВМРО“, а асфалтирале дупки и кај клучката „Континентал“. За вчера беше планирано да се санираат коловозите на улиците „Перо Наков“, „Загрепска“, на „Благоја Стефковски“ и други.
Се крпат само улиците по кои вози автобус
ЈП „Улици и патишта“ е надлежно за одржување на сите сообраќајници по кои минува градски автобус. Тоа значи за сите булевари и за над 80 улици, кои можат да се вклучат во акцијата „Пријави дупка“. За граѓаните да не се доведат во ситуација да бараат интервенција за коловоз за кој не се надлежни од „Улици“, надлежните апелираат граѓаните подетално да се информираат на веб-страницата www.uip.gov.mk. Бидејќи е очигледно дека се' уште не се знае кој за што е надлежен, па на бројот 15300 се бараат интервенции и за општински улици, кои дури се помногубројни од оние што ќе ги земат предвид надлежните од ЈП. |
