Насловна

Поглед

Kој да научи лекција?

Тина Иванова

Со бледи, неуверливи изјави раководството и синдикатот на МОБ се обидоа да ја убедат македонската јавност во оправданоста од откажувањето на претставата „Кармина Бурана“ на фестивалот „Кантарена“ во Франција. Ретка можност оваа уметничка генерација на МОБ да се претстави во земја со вековна култура.

Случајот е познат, патешествието заврши со фијаско, а македонската јавност секако, наоѓа разбирање за откажувањето.

И сега пак прашањето: зошто мораше да се случи тоа што се случи. Зошто мораа уметниците на толку далечен пат да одат со автобуси, зошто на толку луѓе не беше предвидено со нив да патува лекар, зошто од страна на орга��изаторот беа сместени во недолични рурални услови, зошто со преместувањето престојот беше лишен од нормални пансионски услуги, зошто организаторот не беше подготвен за генералната проба, зошто македонските уметници беа принудени да се повлечат од фестивалот, зошто на тамошната јавност не и беше објаснето за неможноста да се настапи на нивната сцена... Зошто, зошто?

Па затоа, затоа што е некој неопитен тие работи да ги предвиди, да ги пресретне, да ги провери, да ги организира, да ги изменаџира како што доликува. Наместо тоа, еве сега и по враќањето, пак иста песна. Вината се префрла од еден на друг. Но, она што е највоочливо, е барањето министерката за култура во иднина да гарантира добра организација за вакви сложени патувања. Па министерката ли е менаџерот, или организатор, или можеби туристичка агенција? Ако директорите и синдикатот на МОБ тоа го гледаат во министерката, тогаш нека си ги напуштат столчињата, па таа нека ја врши и нивната работа.

Но, има ли воопшто некој да ја научи лекцијата?