Градот Скопје ја заврши реконструкцијата на коловозот на сообраќајницата „Ферид Бајрам“, во должина од 800 метри. Обновен е потегот од раскрсницата со булеварот „Христијан Тодоровски-Карпош“ до населбата Железарница.
„Со реконструкцијата на оваа фреквентна сообраќајница значително ќе се зголеми безбедноста во сообраќајот во овој дел на градот. Коловозот на улицата ’Ферид Бајрам‘ беше дотраен и целосно оштетен, па поради тоа постојниот асфалт беше целосно изгребан и нанесен нов асфалтен слој“, велат градските власти.
Градежните работи траеја три недели и за нив од буџетот на Градот беа издвоени 6,5 милиони денари. (С.Н.)
