Кадровски резови и во ДУИ

Алаудин Зекири, заменик-директорот на Управата за јавни приходи кој „пазарел“ со службената платежна картичка, е разрешен од функцијата. Одлуката била донесена на вчерашната седница на Владата, по што е именуван нов заменик-директор на УЈП - Мухамед Ахмети, правник од Тетово, инаку, кадар на ДУИ.

Кадровските смени и рокади што ги почна власта пред неколку недели, главно, поради истекот на мандатите на повеќе директори, но и поради случаите на судири на интереси, ги зафатија и редовите на ДУИ, иако повеќето функционери од оваа партија се на позициите само две години.

На следната владина седница идната недела се очекуваат повеќе интервенции во функционерскиот состав на ДУИ. Партиски извори најавуваат разрешување на заменик-секретарот на Владата, Абдула Азари, на чие место би дошол актуелниот заменик-министер за внатрешни работи Џевад Бучи. За нов заменик-министер во МВР, пак, се планирал Мухамед Исмаили, кој моментно бил заменик-директор во Агенцијата за разузнавање. Пред извесно време, од функцијата заменик-директор во Агенцијата за вработување замина Рахим Лимани, за да остане советник во град Скопје, а на негово место дојде Абдулсамет Шабани. Списокот кадровски промени, според нашите соговорници, нема да заврши со овие имиња.

Од раководството на ДУИ тврдат дека подолго време се анализира работата на сите нивни функционери, иако со првите кадровски интервенции се опфатени само заменичките места. Сепак, ако се има предвид дека евентуалната промена на заменикот во МВР ќе мора да помине преку Собранието, од партијата не се исклучува можноста и поголемо проветрување што би го зафатило и министерскиот состав на ДУИ.

Промените во функционерскиот состав на ВМРО-ДПМНЕ, пак, засега се сведуваат само на поситни интервенции во третиот ешалон на власта и на ротации од една на друга функција. Минатата недела, Владата го именувала Ромео Деребан за директор на Државниот управен инспекторат, бидејќи на досегашниот директор Димитар Ѓеорѓиевски му истекол мандатот. Претходно, Деребан беше разрешен од директор на Инспекторатот за локална самоуправа, за на тоа место да дојде Ванчо Шехтански, кој дотогаш беше директор на Агенцијата за управување со одземен имот. За в.д. директор на оваа Агенција е именувана Ирена Брзанова. (А.М.М.)