Заврши Охридскиот хорски фестивал

Со гала-концерт на најдобрите осум хорови според стручното жири, во Охрид, завчера заврши Охридскиот хорски фестивал, на кој во организација на Охридскиот хор во изминатите пет дена учествуваа 40 хорови од Македонија и од 14 европски земји.

За најдобар и носител на големата награда жирито го прогласи хорот „Груднове шмикле“ од Железники, Словенија, под раководство на Маијета Наглич.

Во петте фестивалски денови на различни локации во Охрид и околината се одржаа 11 концерти - шест натпреварувачки, два концерта на духовна музика и по еден концерт на поп и фолк-музика.

Сите хорови изведуваа по едно дело од македонски автор на македонски јазик и специјални награди за изведба на дело од македонски јазик добија хоровите „Вива воче“ од Унгарија за изведба на компоозицијата „Оздола иде“ од Драган Шуплевски, хорот „Славенски“ од Србија за изведба на „Хумореската бр 2“ од Живко Фирфов и Нишкиот мешан хор од Србија за изведбата на композицијата „Бисера“ од Стојче Тошевски.

Охридскиот хор е формиран пред три години на иницијатива на флејтистот и диригент на хорот Александар Димоски, за да ја заживее хорската уметност во Охрид. Хорот секоја година одржува по неколку хуманитарни концерти во градот, а настапувал и на хорски фестивали надвор од Македонија. (К.Р.)