Невена Поповска



Сквернавењето на споменикот на браќата Миладиновци во Струга, вчера покрена лавина реакции кои доведоа кавга меѓу Друштвото на писателите на Македонија и Управниот одбор на „Струшките вечери на поезијата“.

Имено, Друштвото на писателите на Македонија, вчера преку соопштение до медиумите искажа огорченост од вандалскиот чин над споменикот на браќата Миладиновци во Струга. „Осквернавениот споменик кој, со ликовите на браќата Димитар и Константин, е симбол на македонската национална преродба и идентитет, сега е сурова слика на последиците од девијантната свест за непочитување и рушење на вредностите од македонската културна историја. Индикативно е тоа што овој нецивилизациски чин се случува во континуитет, по обидите за уништување на бистите на Славко Јаневски, Ацо Шопов и Анте Поповски, поставени во градот на поезијата,“ се вели меѓу другото во реакцијата на македонската писателска асоцијација.

ДПМ забележува и за негрижа на институциите во чија надлежност се спомен-обележјата кои, како што се посочува, се составен дел и симбол на безмалку петдецениското постоење на меѓународниот поетски фестивал „Струшки вечери на поезијата“. „Префрлањето на одговорноста за грижата во овој домен зборува за непрофесионалност и некомпетентност на оние што се повикани да го прават тоа. ДПМ, по повод најновиот настан во Струга, потсетува на крајно незавидната состојба на разнебитување на се она што макотрпно и со голема љубов се создаваше на Струшкиот поетски фестивал. Македонската писателска асоцијација не може да се помири со ваквата ситуација и ќе ја обнови иницијативата Меѓународниот поетски фестивал да се врати на матичната асоцијација ДПМ. Познато е дека покренувач и долгогодишен организатор и креатор на СВП беше ДПМ со учество во работните тела на бројни автори и интелектуалци кои во изминатите децении го градеа угледот на фестивалот како врвна поетска манифестација во светот, се истакнува во соопштението од Друштвото на писателите на Македонија.“

На ова реагираше Управниот одбор на СВП, кој во своето соопштение, пак посочува, дека постојано реагира на сквернавењето на спомениците во Струга и води грижа за зачувување на нашето национално и светско богатство. Но, подвлекувајќи дека во последно време тенденциозно и невкусно се вршат обвинувања и напади врз НУМ „Струшки вечери на поезијата“, Управниот одбор подвлекува: „Друштвото на писателите на Македонија, веќе одамна има „мерак“ да ги преземе „Струшките вечери на поезијата иако манифестацијата си има свој статус и акти според кои нормално функционира. Не треба да се фрла прав во очите на нашата јавност и зад тоа да се кријат нечии лични интереси прикривани зад некаква јавна грижа, а само за сопствени цели. ДПМ е еден од иницијаторите на оваа манифестација, но тие никогаш директно не раководеле со неа бидејќи како основачи се јавуваат општината Струга и соодветното министерство. СВП се национална уст��нова и со статут е утврдена нејзината правна положба и дејност, утврдени со законот за култура на Република Македонија и со други закони. Ние сме сите македонски писатели, продолжуваат од СВП, и не може некој да биде помалку или повеќе способен да ја води манифестацијата затоа што припаѓа на ДПМ или на било која друга писателска асоцијација. Фестивалот не може да се врати во матичната асоцијација ДПМ затоа што според своите акти никогаш и не припаѓал таму“-ја завршуваат реакцијата од СВП.