Големиот тендер за медицинска опрема ќе пропадне?
Не е направен избор на речиси повеќе од половината од бараните апарати
Јасмина Јовановска
Пациентите нема да добијат современ и прецизен преглед на најголемиот дел од медицинските апарати што Владата планираше да ги купи со набавката од 40 милиони евра, зашто големиот тендер би можел да пропадне. Болните и натаму ќе мора да се снимаат и нивните болести да се дијагностицираат со помош на стари и дотраени апарати, зашто, како што дознаваме, не е направен избор на речиси повеќе од половината апарати кои се бараат на тендерот. Неофицијални извори велат дека се избрани само едвај една третина од апаратите кои Владата ги барала за потребите на болниците и на клиниките. Од Министерството за здравство веќе десетина дена не даваат конкретна информација до каде е големиот тендер и зошто за поголемиот дел од тендерот не можело да се избере најповолна фирма од која ќе се купат апаратите. Во Министерството вчера првично само ни рекоа дека тендерот тече во најдобар ред, но за кратко време се премислија и излегоа со податок дека е направен избор на опремата од три лота во вредност од 10 милиони евра и тоа, пред се', лабораториска опрема, за кардиологија, рендген-апарати... Притоа, немаше објаснување зошто за другата опрема од 30 милиони евра не е избрана најповолната понуда. Многу не сакаат да коментираат ни фирмите кои конкурирале на тендерот, додека не добијат официјално известување за која опрема која фирма добила.
За разлика од Министерството за здравство, од каде што тврдат дека нема проблеми со тендерот, доброупатени извори велат дека најголемиот дел од понудите за тендерот се одбиени поради нецелосна документација, а другите поради тоа што понудените апарати не одговарале на техничките карактеристики во спецификацијата на апаратите кои ги барало Министерството за здравство. Голем апсурд е, велат неофицијални извори од Министерството за здравство, што се одбиени светски познати фирми за медицинска опрема, со образложение дека не поднеле европски сертификат за квалитет иако нивната опрема се продава низ целиот свет. Поради ваквата дисквалификација, за одредена опрема останала само една фирма и затоа не можело да се направи избор. За одредени сегменти од тендерот нема воопшто понудувачи, како што е, на пример, за пет скен-системот, иако во преткфалификационата фаза од тендерот се зборуваше дека токму за него е формирана специјална фирма. За друга опрема, пак, како да се одело намерно да не се избере апарат со тоа што се барал таков кој ќе ги има техничките карактеристики на сите четири светски познати производители.
Инаку, тендерот се влече повеќе од една година. Иако Владата првично најави дека првите апарати ќе стасаат во јануари годинава, оттогаш помина над половина година, а тендерот се' уште е во фаза на избор. |
