На министерот му се криви другите

За проблемите во здравството, како што се уривањето покриви во болниците, умирање на родилки, немање лекови, за министерот за здравство, Бујар Османи, виновни се политички ментори, но и новинарите што ги пренесуваат нивните оцени.

„Во последно време слушам различни квалификации за здравството, како тоа е гнило и се распаѓа. И покрај напорите на овој состав на Министерството за здравство, некој упорно сака да го оцрни здравството за да извлечат корист за своите политички спонзори и ментори. Секоја несреќа ја користат за да излезат со различни квалификации. Вас, новинарите, сакам да ве замолам да не донесувате генерални заклучоците врз основа за плитки и паушални оцени на поединци и новодни експерти што не направиле ништо додека можеле и биле на функции. Не можам да сфатам како толку лесно преминувате преку тоа и ги амнестирате од тоа дилетантско однесување“, изјави вчера министерот Османи на прашањето како ќе го среди хаосот во здравството по несреќата во тетовската болница. Османи не чувствува одговорност за тетовскиот случај и ја чека полициската истрага за да се најде виновникот.

Премиерот Никола Груевски, сепак, призна дека „овде-онде се јавуваат слабости во здравството“, но со различни активности Владата правела се' што е во нејзина моќ да ги подобри слабостите. (Ј.Ј.)