Лапароскопската метода е селективна
(Повод: текстот „Кила се оперира без хируршки рез“ од Ј. Јовановска)
Проф. д-р Драгослав Младеновиќ
Во написот „Кила се оперира без хируршки рез“ има стручни невистини во однос на хируршката метода опишана во текстот, поточно операцијата на кила (хернија) со помош на лапароскопија. Текстот може во голема мера да ги доведе пациентите во заблуда затоа што лапароскопската метода е многу селективна и не е општоприфатена од многу причини! И покрај долгогодишните напори, оваа метода да се афирмира како метода на избор, пред се' поради тоа што се сметаше за помалку инвазивна во однос на отворените методи, тоа не се случи. Причина за тоа е фактот што оваа метода има и одредени слабости кога се применува во хируршки третман на кила (потреба од општа анестезија, неможност да се обнови динамиката на абдоменалниот ѕид, неадекватно позиционирање на мрежата, процентот на компликации и рецидиви не е помал во однос на другите методи итн.).
Изнесеното во текстот може и треба да биде елаборирано на состанок на Здружението на хирурзите на Македонија за да се избегнат субјективноста при изборот на методата, а пред се' за да не бидат пациентите доведени во заблуда. Право на пациентите е да бидат правилно информирани за одредени методи, за нивните предности и недостатоци, како и за тоа какви се резултатите од нив. |
