Поглед

Скулптури на „Око“

Деспина Трајковска

Не една, не две, туку 29 скулптури ќе се постават на мостот „Око“ во Скопје. Оваа најава дека историски бодигарди ќе ги чуваат минувачите на преминот, дефинитивно ги надмина и најневозможните очекувања од кројачите на ликот на центарот на Скопје.

Ако веќе се навикнавме на секој чекор да се поздравуваме со шмизли, чистачи на чевли, бикови и други животни и занаетчии, а истовремено се подготвуваме војнички да ги одминуваме Александар и фалангата, Гоце, Даме и другарите, на крај памет не ни беше дека минувајќи по „Око“ ќе се дружиме со ликови од историјата, за кои никој не знае кои ќе бидат.

Од уметничката визија на скулпторите ќе зависи составот на друштвото на 29-мина што ќе надвиснуваат на мостот со триметарските бронзени стави. Ликовите треба да се и членови на Археолошкиот музеј. Барем така се тврди. Дури да стасаат до неговите клепки, скопјани ќе се изморат од дружбата со десетици триметарски и петметарски бронзени и мермерни воини, коњаници... Од каде ќе бидат тие – пајонски воини, свештенички од бронзениот период, некој командант на армијата на Самуил, херојот Карпош, а можеби и некој од четата на Јордан Пиперката?

Најважно за некого е ова време да се одбележи како ера на споменици и скулптури во Скопје. Независно има ли сето ова вистинска уметничка нишка. Некој својот сон полека, но сигурно го претвора во јаве. Барем сите да бидеме среќни, па да претендираме за влез во Гинисовата книга на рекорди.

Но, претходно да се донесе уште една одлука, а може и закон. Уште по најмалку една скулптура да се постави во сечиј дом, на тераса или двор. И тогаш, дефинитивно на Скопје не му бега графа во најпозната светска книга, па макар и за кич.