Интервју

Македонија е пример за информатичка технологија во регионот

Блаж Голоб, директор на Центарот за развој на е-управување во Љубљана

Преку ширење на информатичко-комуникациската мрежа им помагаме на институциите и им заштедуваме време и пари

Жаклина Хаџи-Зафирова


Во Охрид се одржува конференцијата за е-демократија, организирана од „Некст сенс“ и од Центарот за развој на е-управување со седиште во Љубљана. Може ли да појасните која е целта на конференцијата?

Една од целите е да се идентификува добрата регионална практика базирана врз седумте столбови што се потребни за развој на информатичкото општество. Тоа се: е-влада, е-демократија, е-бизнис, е-образование, е-истражување и култура, е-правда и е-безбедност, како и е-здравство. Е-демократијата е прифатена како еден од стратешките приоритети за развој на информатичкото општество од владите на земјите во Југоисточна Европа.



Каква е улогата на Центарот за развој на е-управување во Југоисточна Европа?

Центарот во Љубљана промовира поширока политика на креирање, правна регулатива и информатички и комуникациски технологии за имплементирање на решенија за успешно регионално управување и развој во Југоисточна Европа. Центарот е формиран во 2008 година од Регионалниот совет за соработка - „– eSEE “, потоа Владата на Словенија, Европската фондација, УНДП, академијата ИНА и SRC.SI D.O.O. , како и двата партнера „Мајкрософт“ и „Сименс“. Сите тие ја препознаа важноста за регионална соработка и на јавното приватно партнерство за развој на информатичко-комуникациските технологии во Југоисточна Европа.



Како го поддржувате развојот на е-управување и им помагате на државните институции?

Преносо�� на знаење и развојот на принципот на е-управување во регионот на ЈИЕ се спроведува во рамките на Центарот за е-управување. Центарот има цел да обезбеди регионална конекција за интензивирање на соработката меѓу ЕУ-институциите и земјите-членки, како и меѓу земјите на ЈИЕ. Поточно, активностите на Центарот се насочени кон оспособување на човечкиот капитал, регионалните бизниси, невладините и друг вид организации. Преку ширење на информатичко-комуникациската мрежа, а врз база на принципот на е-управување им помагаме на институциите и им заштедуваме не само време, туку и пари. За промоција на седумте столбови на информатичкото општество организираме и семинари, работилници и тренинзи за различни таргет групи.



Каде се позиционира Македонија во однос на практикувањето на е-демократија во споредба со соседите?

Република Македонија е многу напредната на ова поле. Успешните решенија за информатичка и комуникациска технологија во Македонија може да бидат употребени како добар пример во другите земји на Југоисточна Европа, а земјата може да го сподели своето искуство на полето на е-демократија. „Некст сенс“, која е етаблирана регионална софтвер компанија, се грижи за успешните решенија на информатичко-комуникациската технологија, што овозможува подобро функционирање на владите и на парламентите.



Колку е напред Словенија во однос на информатичката технологија?

Од зачленувањето во ЕУ, Словенија разви голем број е-услуги. Предноста на членството во ЕУ е достапноста до слободен проток на информации и знаење меѓу земјите-членки. Од тој аспект, Словенија можеше да учи и да соработува со другите земји-членки, кои веќе имаа развиено јавни услуги на принципот на е-управување. Ова очигледно е една од причините зошто Словенија напредуваше во областа на е-влада и ги подобри онлајн- услугите во споредба со постарите земји-членки на ЕУ.