Бедата најголем проблем во Прилеп

ПРИЛЕП - Корупцијата е трета на листата најголеми проблеми на граѓаните, по сиромаштијата и невработеноста. Ова се заклуч��ците од анкетата што ја реализира невладината организација „Центар за граѓански иницијативи“ во три општини: Прилеп, Долнени и Кичево. Граѓаните сметаат дека во државата има корупција, но не постои соодветна законска регулатива, ниту доволно санкции за да се спречи оваа општествена аномалија.

„24 проценти од анкетираните сметаат дека најмногу корупција има во политичките партии, 60 отсто одговориле дека државата нема ефикасно законодавство, а за спречување на корупцијата, 49 отсто испитаници сметаат дека е потребно поефикасно работење на судството. Голем дел, или 80 проценти веруваат дека корупцијата може да се намали“, изјави Марина Ѓорѓиоска-Китаноска, заменик-директор на програми во центарот.

Испитаниците ги посочиле и патиштата за брзо откривање на коруптивните случаи, но општ заклучок е дека без развој на свеста, тешко може оваа аномалија, која е навлезена во сите општествени пори, да се стави под контрола.

„Информираноста на граѓаните за законите од областа за спречување на корупцијата е на незначително ниво и се појави потреба од обуки на припадниците од ромската заедница во насока како да постапуваат со конкретен случај на корупција“, информира Илија Адамчески, правен советник во Центарот.

По завршување на целосната анализа, сите заклучоци и препораки од проектот, „Центарот за граѓански иницијативи“ ќе им ги стави на располагање на надлежните институции, а комплетна информација ќе биде проследена до Антикорупциска комисија за да може да се преземат мерки и да се зголемат заштитните механизми секаде каде што затајува системот. (Мн.Т.)