Среде зима се остриме за градска плажа

Градот Скопје интензивно се подготвува за изградба на втора градска плажа

Деспина Трајковска

Среде зима градските власти со мислите се веќе во лето, па интензивно се подготвуваат за летниот проект, втора градска плажа. Овој пат на левиот брег на Вардар. Со морски песок и лежалки, пливање на суво, разладување под тушеви и на шанкови, повеќе терање кафе-шема отколку враќање на духот на градските плажи на кои се сеќаваат старите скопјани. Вака ќе изгледа и оваа плажа, чија изградба се очекува да започне најдоцна до пролет. Ќе се протега на левиот брег на Вардар од мостот „Гоце Делчев“ до Камен мост.

Практично, ќе се гради нова плажа со имиџ ист како на таа што беше отворена летово. Иако за првата градска плажа што беше изградена зад Градски парк, според официјалните изјави се потрошија 100.000 евра, за втората во буџетот за 2011 година се предвидени 150.000 евра. Иако поскапа, сепак, нема да се разликува од постојната. Ќе има шанкови, кои бесплатно ќе се издаваат на избрани угостители. Новина за оваа плажа е тоа што во нејзина непосредна близина ќе има и сплав со кафулиња, кој е дел од проектот на Градот за изградба на четири сплава на реката Вардар.

Според објаснувањата од Градот, ангажираниот изведувач „Алкон“, истата фирма што ја изгради и првата плажа, ќе има обврска да ја уреди плажата. Тоа значи дека ќе треба да донесе морски песок и да го изведе потребниот систем за водоснабдување, електрика и системот за отпадни води. Градот, пак, ќе се погрижи за урбаната опрема и за одржувањето на плажата.

„Проектот е речиси идентичен, единствено станува збор за нова локација. Плажите нема да се разликуваат по начинот на функционирање и изгледот. Единствено се' уште не го знаеме бројот на шанкови“, велат од Градот задоволни од интересот на скопјани за плажата што се отвори летово.

Токму тој факт, но и основната идеја за плажите, покрај Вардар лете да се обезбеди место за одмор како во минатото е причина и за изградба на втората плажа. Градоначалникот Коце Трајановски неколкупати досега изјави дека со овој проект Градот се обидува да го врати духот на старо Скопје, па од тие причини ги избира и истите локации на кои некогаш имало градски плажи.

Иако во Скопје некогаш имало неколку плажи, меѓу нив најпосетени Руската плажа, Градската плажа, Офицерската и плажата „Лебед“, засега, барем како што тврдат од Градот, не е планирана локација и изградба на евентуално трета и четврта плажа.