Фрапантна бројка на заболени од рак во Битола
Битола - Годинава во Битола се евидентирани над 400 заболени од рак. Фрапантна бројка која, за жал, не отстапува од светскиот просек, сметаат од Лигата за борба против ракот во Битола, здружение кое токму поради ваквата здравствена слика во градот е формирано пред четири години.
„Имаме евиденција и, за жал, тој број постојано расте“, истакна Никола Трајков, претседател на Здружението на годишното собрание. Како најголем проблем за болните од рак во Битола, и покрај тоа што пред неколку години е отворен онколошки центар, е зрачната терапија. За оваа услуга болните и натаму мора да патуваат во Скопје на свој дополнителен трошок.
„Мора да ја натераме власта во следниот период во оваа општина, каде што има над 200 илјади граѓани, да обезбеди апарат за зрачење. На овие болни им е потребна таа помош, да се ослободат од патувањето во Скопје“, вели Трајков, напоменувајќи дека е неопходна и континуирана набавка на сите лекови во Онколошкиот центар во Битола.
Според СЗО, до 2010 година се очекува ракот да ги надмине кардиоваскуларните болести. (А.Б.) |
