Тренерот бил од СДСМ, нема веќе да се вежба одбојка

Партиската припадност е главен услов за тренинз��те на децата во Прилеп

Моника Талеска

Прилеп - Над 60 основци од Прилеп не можат повеќе да тренираат одбојка во основното училиште „Гоце Делчев“ поради партиската припадност на нивниот тренер. Така тврди Слободан Ристески, кој што два месеца одржувал тренинзи во ова училиште, до моментот кога директорот на училиштето, Трајче Каралиоски, му кажал дека веќе не може да ја користи спортската сала.

Ристески истакнува дека уредно ја платил киријата т.е. ја обележал салата како што се договориле со директорот, а во доставеното барање до училиштето ја изразил подготвеноста да му биле зголемена киријата во разумни граници или на друг начин да придонесе за подобрување на условите за спортување. Тој вели дека барањето не било разгледано, а директорот Каралиоски му ги пренел категорично ставовите на локалната власт дека поради партиската припадност нема да одржува тренинзи.

„Знам дека на ова што ќе го кажам ќе дадат нивна интерпретација: ’Лаже, не е тоа така‘, меѓутоа, ова е чиста вистина. Директорот на училиштето ми рече: ’Бидејќи си член на СДСМ, имам забрана од локалната‘. Му рекле: ’Да го тргнеш од салата, да не тренира со децата‘. Во уписот на децата, како членови на мојот клуб, јас досега во ниту еден момент немам прашано ниту едно дете ниту еден родител на која политичка партија припаѓаат“, реагира тренерот Ристески.

Поради прекин на тренингот, вознемирени и револтирани се и родителите на учениците. Тие најавија дека ќе се организираат и ќе достават петиција за да се обезбеди простор за тренинг на децата.

„Партијата нека си ја тераат таму каде што е место, не во училиште. Овде треба да се учи, да се спортува, зошто талентирани деца да прекинуваат со тренингот“, вели Добривој Бумбароски, дедо на едно од децата.

И останатите родители се вознемирени. Велат дека тренинзите на децата треба да продолжат, а оние што ги попречуваат треба да размислат дека со спорт кај децата се развива здрав дух, во спротивно тие се фрлаат во канџите на болестите на зависност што ги има на секој чекор во Прилеп.

Директорот Каралиоски ги демантира наводите на Ристески. Тој тврди дека нема никаква политика во оваа негова одлука, туку само доследна примена на законот. Доколку барањето доставено на 9 декември го усвои Управниот одбор, Ристески може пак да ги одржува тренинзите во училиштето.

„Кога дојде пред два месеца јас го примив без проблем и му реков дека ќе излезам пресрет, зашто дотогаш тој тренирал во ОУ ’Рампо Левката‘ каде што се реновира салата. Но, минаа два месеца и веќе не може без договор со училиштето да ги одржува тренинзите. Ако Управниот одбор му дозволи, нека продолжат тренинзите. Не е вистина дека поради неговата партиска припадност се прекинати тренинзите“, вели Каралиоски.