Радикализирање или маневар на ДУИ

Со последните изјави околу името, во ДУИ се блиску до ставовите на опозицијата

Александра М. Митевска

Личен став на државен функционер или нов притисок за омекнување на ставовите на ВМРО-ДПМНЕ околу проблемот со името? ДУИ вчера ја премолча изјавата на партискиот потпретседател и потпретседател на Собранието, Рафиз Алити, кој порача дека Албанците од Македонија ќе влезат во НАТО и во ЕУ со или без Македонците.

Со тоа изостана и информација дали Алити дополнително се консултирал со својата партија, како што го советуваа партнерите од ВМРО-ДПМНЕ, од каде што заклучија дека изјавите на потпретседателот на ДУИ не секогаш соодветствуваат со официјалниот партиски став.

Лидерот на ДУИ, Али Ахмети, вчера во Скопје се сретнал со премиерот Никола Груевски, но нема информации дали воопшто се разговарало за изјавата на Алити, бидејќи средбата беше оквалификувана како тековна.

Но, без разлика дали Алити го пренел само своето мислење, неговата изјава е уште една потврда за тезите дека приоритетите на албанската заедница во Македонија се разликуваат од приоритетите на македонската заедница, која со поголеми емоции ги опсервира случувањата околу името, и покрај очекувањата дека со затворањето на спорот за Македонија ќе се отворат вратите на ЕУ и на НАТО. Оттаму и прашањето дали евентуално прокоцканата шанса за ефектуирање на позитивниот извештај на ЕК би можело да биде причина за радикализација на албанскиот фактор во земјава?

Професорот Јетон Шасивари смета дека изјавата на Алити е резултат на ултимативните и тврди ставови на ВМРО-ДПМНЕ и на премиерот Груевски околу референдумот и можноста за компромис со Грција. Според него, таквите изјави можеби се предупредување за Груевски, но тие немаат поголема тежина се' додека не се официјализираат во органите на партијата.

„Сепак, факт е дека ако се оди на референдум, без меѓупартиски и меѓуетнички консензус, нема да може да се создаде позитивна клима околу целиот процес, така што можни се нови поделби во општеството. Така, референдумот од инструмент за надминување на спорот со Грција може да стане инструмент за нови недоразбирања внатре во државата“, оценува Шасивари.

Алити, всушност, не е прв функционер од ДУИ, кој го засили тонот во однос на менаџирањето на проблемот од кој зависи европската иднина на земјата и кој укажува на можните реперкусии од неговото нерешавање во едно раслоено општество како македонското. Потпретседателката на ДУИ, Теута Арифи, уште пред неколку месеци коментираше дека Албанците во Македонија ќе бидат принудени да побараат други алтернативи, доколку до крајот на годинава не се евидентира прогрес во евроатлантското интегрирање! Сега прашање е дали препораката од ЕК - Македонија да ги почне преговорите за членство во ЕУ ќе може да се смета за прогрес на патот кон Брисел, доколку не биде потврдена од Советот на ЕУ?

Примирјето што го склучија ДУИ и ВМРО-ДПМНЕ по бранувањата околу енциклопедијата последниве денови напукнува поради се' поотворените барања на албанскиот коалициски партнер власта да се однесува одговорно и да не се крие зад референдумот, бидејќи, како што вели пратеникот Џевад Адеми, доблест на политичарите е да носат и непопуларни одлуки. Неговата сопартијка Арифи, пак, во редовната колумна во „Дневник“ забележа дека „кога политичките елити немаат храброст да го потрошат својот изборен кредит за доброто на граѓаните, навистина докажуваат дека имаме проблеми со членството во НАТО и во ЕУ“.

Невообичаено, но реално - ставовите со кои во последниов период настапуваат челниците на владејачката ДУИ се многу поблиски до размислувањата на опозицијата за тоа како би можел да се затвори долгогодишниот спор со Грција и да се деблокираат интегративните процеси. Лидерот на ДПА, Мендух Тачи, неодамна изјави дека евентуалниот референдум за името би можел да има домино ефект, па и Албанците во Македонија да почнат да распишуваат референдум за прашања чие отворање би било опасно во овој момент, како за тоа дали се за федеративно уредување или дали сакаат да живеат заедно со Македонците.