Претходен број

Македонските медиуми во политички пранги

„Фридом хаус“ повторно дава лоши оценки за медиумите и за корупцијата во земјава

Даниела Трпчевска

Политичкото влијание врз медиумите, судството на кое му се забележува за заостанати и нерешени случаи, како и високиот степен на корупција во Македонија, се' уште се црни точки наведени во последниот извештај на организацијата „Фридом хаус“.

Македонија во извештајот има најлош рејтинг во делот за слободата на медиумите и корупцијата. На скалата од 1 до 7 (каде што седумката е најлоша оценка, Македонија е рангирана со 4,25 во однос на слободата на медиумите. Ваквиот рејтинг земјава го има уште од 2004 година, за разлика од 2000, кога состојбите со медиумите беа оценувани како многу поповолни.

„Финансирањето и политичкото влијание остануваат и понатаму најголем проблем во земјава, бидејќи многу локални радиостаници и списанија беа затворени поради недостиг од финансии. Сепак, неколку национални телевизиски канали започнаа да емитуваат програма во текот на 2008 година. Сопственоста на водечките печатени медиуми е мошне концентрирана“, се оценува во извештајот на „Фридом хаус“.

Во него се заклучува дека за време на парламентарните избори во јуни 2008, медиумите не ги третирале еднакво сите политички партии, а имаше и неколку примери на насилство врз новинарите. „Многумина се соочија со тужби за клевета, вклучувајќи ја и тужбата поднесена од премиерот. И покрај Законот за слободен пристап до информации, пристапот до информации е проблематичен за новинарите и за засегнатите граѓани“, се вели во извештајот.

Според „Фридом хаус“, судскиот систем и натаму страда од значителен број заостанати и нерешени случаи. Иако реформите во 2008 година се одвиваа со малку забрзано темпо, тие делумно беа потиснати од тужбите за клевета поднесени против новинарите, така што рејтингот на Македонија за судството и независноста останува непроменет во однос на претходната година – 4,00.

Во однос на корупцијата, во извештајот се забележува подобрен рејтинг на земјата од 4,50 на 4,25, што се должи на мерките преземени во 2008 година за борбата против корупцијата и апсењето на јавни личности.

Полоша оценка во последниот извештај Македонија доби и за изборниот процес, кој е оценет со 3,50, за разлика од минатогодишнит�� избори кои се рангирани со 3,25 поени на скалилото на „Фридом хаус“. Притоа, во извештајот се посочуваат ланските изборни неправилности и инциденти во кои едно лице загина, а неколкумина беа повредени.

„Исто така, во 2008 година се намали цензусот за претседателските избори од 50 на 40 проценти одѕив, што ја ограничува потребата на претседателските кандидати да освојат поддршка од гласачите од различните етнички групи“, оценува аналитичарот Жидас Даскаловски во анализата направена за „Фридом хаус“.

Во однос на националното демократско владеење, регистриран е коефициент 4,00, а непроменет останува рејтингот и во однос на развојот на граѓанското општество и влијанието на невладините организации - 3,25.

Извештајот прогнозира дека Македонија годинава ќе се соочи со тензии во владејачката коалиција, а албанскиот коалициски партнер ќе биде под притисок да ја напушти Владата. Настаните на Косово би можеле негативно да влијаат на меѓуетничките односи во земјава, а Владата ќе биде и под притисок да ги продолжи економските реформи и да постигне поголем развој.

Евроатлантските интеграции се очекува да придонесат за стабилизација на земјата, се оценува во извештајот на „Фридом хаус“.

Во извештајот, кој се фокусира на анализа на 29 земји во светот, се наведува дека состојбата со демократијата во повеќето од поранешните комунистички држави од Источна и Централна Европа и Евроазискиот регион се влошила во текот на 2008 година. Влошување на состојбите има и кај балканските земји, односно во Хрватска поради нападите на новинари и во БиХ поради се' уште присутните етнички поделби.