Претходен број

Баросо се прогласи за некомпетентен за Егејците

Продолжува лобирањето за македонското малцинство во Грција

Димитар Чулев

Македонија ќе продолжи да лобира во меѓународната заедница за правата на македонското малцинство во Грција, најави вчера премиерот Никола Груевски, откако доби незадоволувачки одговор на писмото упатено на адреса на претседателот на Европската комисија, Жозе Баросо. „Борбата за нашите права и нашата правда е макотрпна и долга. Ние продолжуваме со интернационализација на обидите за добивање поддршка секаде каде што можеме“, изјави Груевски коментирајќи го писмото-одговор од претседателот на Европската комисија.

Баросо наведе во писмото дека Европската комисија нема надлежност за решавање на ова прашање. „За Комисијата се многу важни почитувањето на човековите права и слободи, но Европската унија не е компетентна да третира прашања за идентитетот и правата на малцинствата, нивната националност и враќањето на нивната сопственост во земјите-членки на Унијата, стои во писмото на Баросо, чиј одговор беше објавен во петокот на некои од македонските телевизии. Претходно, премиерот Груевски испрати писма до својот грчки колега Костас Караманлис и до Баросо во кои се тврди дека во Грција има македонско малцинство кое треба да биде признато.

Но, шефот на ЕК смета дека „тоа зависи од земјата-членка која е засегната во спорот и тоа во светлината на уставните и традициите на нејзините меѓународни обврски“. Претседателот на ЕК уште еднаш повика на дијалог меѓу Грција и Македонија, подвлекувајќи дека добрите односи со соседите се важни за напредокот на Македонија кон членство во ЕУ. 

Медиумите, особено оние во Грција, го прејудицираа таквиот одговор на шефот на Европската комисија, откако претходно грчкиот премиер Костас Караманлис во одговорот на писмото категорички негираше дека во Грција има или имало македонско малцинство. „Нов иредентизам од Скопје, овој пат и кон Европа“, „Груевски со манија за испраќање писма“, „Прв чекор на иредентизам во Европа“... „Груевски може да ги кажува своите ставови за што сака, но, во секој случај, ЕУ и сите нејзини партнери целосно и детаљно се информирани за грчките позиции“, изјави министерката за надворешни работи, Дора Бакојани.

„Грција тргна во офанзива во ЕУ за да ги спречи последиците од писмото на премиерот Никола Груевски со една главна порака – дека Атина нема да преговара за ништо друго освен за името на Македонија“, јави минатата недела дописникот на „Утрински весник“ од Брисел, кој истакна дека грчките политички кругови очекуваат Европската комисија да го намали значењето на писмото и на прашањето што го отвори премиерот Груевски. Но, писмото се разгледувало во кабинетите на претседателот на ЕК, Жозе Мануел Баросо, и на еврокомесарите за проширување и за правда и внатрешни работи , Оли Рен и Жак Барот, „а тоа не е далеку и од ресорите за јазични прашања и за заштита од социјална и друга дискриминација“ – напиша нашиот дописник од Брисел.

Во интервју за „Утрински“, Павлос Воскопулос, член на колективното раководство на Виножито, изјави дека писма треба да се испраќаат, но дека вистинско место за дебата околу македонското малцинство во Грција е Советот на Европа. „... во извештаи од комисии на меѓународни институции на како ЕКРИ на Советот на Европа, и други невладини меѓународни организации сите овие години го спомнуваат јасно македонското малцинство во Грција и упатуваат остри критики против Грција за недемократското однесување спрема малцинството“, вели тој.

Во саботата, министерот за надворешни работи, Антонио Милошоски, испрати писмо до комесарот за повеќејазичност при Европската комисија, Леонард Орбан, со кое апелира да ги поддржи барањата на припадниците на македонското малцинство во Грција.

„Наспроти одредбите на Европската конвенција за човекови права и Рамковната конвенција за заштита на националните малцинства, во Грција не се почитува јазичната различност на македонското национално малцинство... Овој проблем е елабориран и во извештаите на Европската комисија за расизмот и нетолеранцијата, на грчкиот Хелсиншки монитор и на други невладини организации“, истакнува шефот на македонската дипломатија. Тој апелира до Орбан да ги поддржи барањата за заштита на македонскиот јазик како малцински јазик во Грција.