Вашингтон не' потсетува на Охридскиот договор

Вашингтон - САД ја поддржуваат Македонија за членство во НАТО и во Европската унија што е дел од напорите за промоција на мирот и стабилноста на Балканот, изјави Томас Кантримен, американски заменик помошник државен секретар на вчерашното сослушување во Хелсиншката комисија на Конгресот, посветено на Балканот.

Тој оцени дека Македонија ги исполнила речиси сите технички стандарди поставени од ЕУ и оти Европската комисија препорача почеток на преговорите за членство, пренесува Радио Слободна Европа.

„За да се задржи овој позитивен импулс, ја охрабруваме македонската Влада да го утврди како приоритет подобрувањето на меѓуетничките односи така што ќе ги спроведува и одредбите и духот на Охридскиот договор. Македонија мора и натаму да остане фокусирана врз реформите, пред се', кога станува збор за владеењето на правото, порача Кантримен.

Тој додаде дека е најважно што поскоро да биде решен спорот меѓу Скопје и Атина за името, а Вашингтон ги поддржува напорите на посредникот Метју Нимиц и ќе прифати секое решение за кое ќе се договорат двете страни. (МИА)