Писмото на Милошоски не ја убеди Атина

Од нашиот дописник
Миркица Поповиќ


Атина - Писмото на Антонио Милошоски до својот грчки колега Димитрис Друцас за Грција не е некој доволно силен мотив за промена на ставовите во однос на поддршката за влез во ЕУ и проблемот со името.

Имено, како што истакна портпаролот на грчкото Министерство за надворешни работи, Григорис Делавекурас, најпрво за содржината на писмото во кое Милошоски бара поддршка од Грција и конструктивен став за добивање датум за преговори, а не блокирање на декемврискиот самит на ЕУ, се информирале преку медиумите, бидејќи самото писмо стигнало неколку дена подоцна.

„Го цениме овој допис, но на начинот на кој е напишано покажува дека има комуникациски карактер, а не суштина“, истакна Делавекурас. Портпаролот на грчкото МНР истакна дека дополнително ќе го проценат дописот и, според тоа, ќе одлучат дали е потребен одговор.

Писмото до грчкото МНР беше испратено пред една недела, а во исто време македонскиот министер за надворешни работи писма со слична содржина испрати и до останатите држави-членки на ЕУ.

Грчкиот весник „Етнос“, кој држи порадикални ставови за спорот со името, коментира дека на самитот на ЕУ речиси и нема шанси за позитивна одлука за датум за преговори, што според нив и не е толку застрашувачки за Владата на македонскиот премиер Никола Груевски. Писмото на Милошоски во кое се бара зелено светло од Грција според „Етнос“ во Атина не било сфатено како сериозен обид од македонска страна. Иако изостана стандардниот коментар од грчкото МНР дека Грција ја поддржува Македонија на патот кон ЕУ и ќе биде нејзин најголем сојузник за прием во европското семејство откако ќе се реши проблемот со името, Атина продолжува со активностите за Западен Балкан.