„Арт-базар балканика“

Во Домот на занаетчии во Старата чаршија денеска се отвора „Арт-базар балканика“, партнерски проект на занаетчиските комори на Скопје и на Кобленц од Германија. На едно место ќе бидат претставени умешноста, квалитетот и уметноста во кои вештите раце ги имаат испреплетено традицијата, културата на живеење со новото и современото. Базарот ќе биде отворен од 18,30 часот, а организаторите ветуваат дека изложените предмети се празник за душата и очите.

Од Занаетчиската комора објаснуваат дека со базарот се создаваат услови за самовработување на членовите од едно семејство, а истовремено се подобрува и стандардот на населението. Ваквите настани се повод за промоција и продажба на традиционалните занаетчиски производи и услуги, но и за промоција на историските објекти на Скопје. Приходот од продажбата на производите ќе им помогне на занаетчиите за сопствен натамошен развој. Ваквите настани, исто така, даваат можност за опстанок на старите занаети како што се филигранот, резбата, везењето, плетењето, сликањето икони, изработката на свеќи. (Сн.К.)