Вмровците го признаваат само судот на партијата

Владата и функционерите ја игнорираа Антикорупциска се' додека ВМРО-ДПМНЕ не нареди да се напуштат вишокот функции

Александра М. Митевска


Врз основа на партиски процени се правел избор кој функционер на којa позиција треба да остане, како што под диктат на Централниот комитет на ВМР��-ДПМНЕ почна и целата акција за развластување на партиските кадри, кои истовремено земаа и функционерски плати и паушали. Од ВМРО-ДПМНЕ тврдат дека им оставиле можност на функционерите сами да одлучат кое столче ќе го испразнат. Но, содржината на оставките што фрчат последниве денови, сепак, поттикнува сомневања дека и партијата вмешала прсти при расчистувањата на случаите на судир на интереси и кумулација на функции – една и пол година по локалните избори на кои голем број од кандидатите за советници во општините веќе биле именувани функционери.

Довчерашниот директор на МЕПСО, Владимир Здравев, на пример, до последен момент пушташе сигнали дека ќе го задржи попрестижното директорско место, за на крај, сепак, да реши да остане локален функционер во Советот на општина Центар. Прашање е дали Здравев ќе ја донесеше истата одлука да беше советник во некоја друга општина во која проектите што ги турка власта не се толку специфични и контроверзни. Владимир Бахчовановски, пак, во соопштението дека се повлекува од функцијата советник во Центар за да остане директор на ЈП за стопанисување со стан��ен и деловен простор, самиот наведе дека го запазил рокот што го поставиле највисоките органи на партијата. И доскорешниот директорот на струшкото училиште „Нико Нестор“, Никола Затуроски, кој остана во локалната самоуправа, во една изјава посочи дека одлуката да биде само советник ја донел заедно со партиското раководство.

„Централниот комитет е највисок партиски орган меѓу два конгреса и непочитувањето на неговите одлуки се смета за прекршок“, ни рече функционер на ВМРО-ДПМНЕ на прашањето што ќе се случи ако некој не ја послуша партиската одлука за декумулација на функциите. Сепак, во ВМРО-ДПМНЕ се убедени дека сите ќе постапат во согласност со одлуката на ЦК. Всушност, и во случај на нејзино непочитување, Владата би можела да ги разреши „непослушните“ функционери што таа ги именувала, иако нема механизам за одземање на мандатот што советниците го добиле на избори.

Друга работа што фрла сенка врз обидот на владејачката партија да се промовира како доследен почитувач на законите е фактот што нејзините функционери, па и самата Влада, долго време ги игнорираа предупредувањата на една државна и контролна институција - Антикорупциската комисија дека се прекршуваат законите за спречување корупција и судир на интереси. Но, потоа речиси сите ја испочитуваа одлуката на ЦК на ВМРО-ДПМНЕ за деакумулација на функциите. Сличен беше и случајот со поранешниот директор на Агенцијата за спречување перење пари, Ване Цветанов, кој си поднесе оставка во исто време кога ЦК на ВМРО-ДПМНЕ донесе одлука за негово разрешување. Откако поднесе оставка Цветанов беше разрешен и од Владата, која, пак, претходно долго време беше глува за барањата на Комисијата за спречување на корупцијата за негова смена.

Од друга страна, вадејќи се на препораките од Антикорупциска, ВМРО-ДПМНЕ ги амортизираше внатрепартиските превирања поради изнудените оставки и, всушност, тивко, ама темелно ја реконструираше својата трета постава. На крајот, комисијата не беше удостоена ниту со известувања за оставките на прозваните функционери. Според претседателот на Антикорупциска, ваквото однесување на владините функционери е доказ за ниско ниво на професионалност и политичка култура, бидејќи во конкретниов случај партијата се става пред законот.

Слаѓана Тасева, поранешна претседателка и членка на Државната комисија за спречување на корупцијата, вели дека на потегот на ВМРО-ДПМНЕ не мора да се гледа како на заобиколување на Антикорупциската комисија. Според неа, тој чекор може да се смета и како поддршка на препораките на Комисијата. Сепак, наведува таа, ќе беше многу посоодветно апелот за повлекување од функциите да дојдеше од Владата, бидејќи во повеќето случаи во прашање се функционери што таа ги именувала. Случаи на неспоивост на функциите има и кај други партии, иако процентот е најголем кај ВМРО-ДПМНЕ, како најголема партија на власт која има под контрола и речиси две третини од локалната самоуправа.