За духовната штета што ни ја нанесовте

Бигорското братство

Повод: текстот „Остри препукувања на игуменот на Бигорски со СДСМ“ на Билјана Јовановска, објавен во „Утрински весник“ на 20 април 2010.



Нашето братство со жалење нагласува дека воопшто не беше консултирано од новинарката при создавањето на овој напис, кој изобилува со коментари и невистини на новинарката и на една политичка партија.

Доколку објективно го прочитате текстот, веднаш ќе согледате дека тој претставува своевидна новинарска колумна, во која не само што воопшто не се зема предвид мислењето на Црквата, туку се прави и голема соблазна, поставувајќи ја Македонската православна црква, а во конкретниот случај Бигорскиот манастир, во дневнополитички рамки.

Бигорскиот манастир отсекогаш бил голема културно-историска, национална и духовна ризница на овој народ и затоа не мора да потсетуваме дека во обновата на ова древно светилиште сме повикани да се вклучиме сите, зашто така го градиме својот ентитет, но притоа секоја помош треба да е според учењето на Светото евангелие за да му биде угодна на Бога.

Не смееме да си дозволиме од донациите на верниците да правиме реклама, ниту, пак, да дозволиме политиката да одлучува за длабоко црковни прашања или новинари-поединци да создаваат јавна свест за важни црковни прашања.

Секое наше дело, секој наш збор треба да е во согласност со вистината. Светата православна Црква и нашиот манастир го благословува секој човек кој доаѓа во името Господово. Манастирот низ вековите, па се' до денес ги прегрнува сите луѓе, но најмногу паднатите во грев и како таков тој претставува вистинска утеха за многубројните верни луѓе кои притекнуваат кон него.

Затоа, новинарите, кога создаваат определени написи, мора да се водат од вистината и треба да се потсетат дека сите луѓе прво се верници, а потоа извршуваат и определени професии. Секоја работа е добра ако таа му е угодна на Бога. Новинарството е една од професиите каде што новинарите се соочени со голема одговорност во поглед на веродостојното информирање, затоа што преку јавните медиуми тие ја поседуваат привилегијата да ја обликуваат јавната свест и доколку несовесно го прават тоа, се претвораат во моќно оружје против сопствениот народ, Црквата, традицијата и културата. Затоа, имајќи ја предвид духовн��та штета која му се нанесува на народот во вакви случаи, загрижува фактот дека новинарката Билјана Јовановска ги преточила во напис своите грешни помисли, без да ги провери со духовно лице од манастирот, а со крајна цел да го исполитизира манастирот.

Секој човек треба да внимава на своите постапки за да не ја навреди со нив и Црквата, бидејќи таа е наша мајка на земјата, место каде што се утешуваат луѓето. Бигорското братство и' простува на новинарката за грешните помисли кон манастирот и се моли за нејзино спасение и за издигнување на нејзиниот ум кон покајание.