ЗНМ го осуди етикетирањето на „Утрински“ од МНР

Здружението на новинари на Македонија остро реагираше вчера на соопштението на Министерството за надворешни работи во врска со текстот објавен во „Утрински весник“ -„Милошоски на приватно патување со државни пари„ - во кое се обвинува и се етикетира целиот весник.

ЗНМ смета дека надлежноста на МНР не е да ја оценува работата на новинарите, туку да и' понуди на јавноста дополнителни факти и аргументи за посетата на министерот. Правото на демант и реакција постојат заради расветлување на вистината, а не да се етикетира медиумот дека е политички обоен, за да се девалвира неговата работа, стои во соопштението.

„Ако некој се огрешил пред Кодексот на новинарите, тука е Советот на честа да го констатира тоа. Крајно некоректно е МНР да ја оценува намерата на авторот на текстот“, заклучува ЗНМ.