Балканот во ЕУ за десет години
ЊуJорк - Словенечкиот претседател, Данило Тирк, изјави дека за десет години сите земји од Балканот ќе бидат членки на Европската унија и нагласи дека европската перспектива на Србија е зајакната по апсењето на последниот хашки бегалец, Горан Хаџиќ. Тој нагласи дека е добро што стратегискиот правец на регионот е јасно дефиниран и додаде дека Европа не може да остави „црна дупка на своја територија“.
„Секако, има тешкотии, но знаеме каде треба и каде оди целиот регион. Знам дека постои значителен замор од ширење, но нема смисла да имаме црна дупка среде Европа“, рече Тирк.
Тирк истакна дека подоцна во текот на годинава Србија ќе добие статус на кандидат за членство во ЕУ и, можеби, датум за почеток на преговори. Тој потсети дека Црна Гора, која доби статус на кандидат во декември, се очекува во Унијата да влезе во 2015 или во 2016 година. „Босна има внатрешни проблеми, но доколку сите околу неа влезат во ЕУ, неминовно и тоа ќе има позитивно влијание и врз БиХ. Истото тоа важи и за Македонија“, додаде Тирк. (МИА) |
