Насловна

Попоски се прогласи за министер пред изборот

Уште пред формално да се изгласа новата влада, Никола Попоски на „Фејсбук“ стана министер за надворешни работи на Македонија. Веќе со полна пареа работи страницата на „Фејсбук“ - „Никола Попоски - министер за надворешни работи“, каде што може да се видат неколку официјални слики од неговата досегашна работа во ЕУ, датумот на раѓање без некакви официјални податоци за образованието и неговото досегашно работно искуство. Страницата редовно потсетува дека не треба да се испушти собраниската седница на 27 јули на која ќе се гласа новата влада. Бројот на фановите засега е малку повеќе од 400, а секојдневно се множат коментарите со кои му честитаат за новата функција и му оставаат аманет како да се справи со спорот за името меѓу Македонија и Грција.

Од Министерството за надворешни работи велат дека конкретната страницата не е официјалната „Фејсбук“ страница на новиот шеф на македонската дипломатија. Планирано е откако тој ќе го преземе кормилото на МНР, да се изработат негова официјална „Фејсбук“ страница и „Твитер“ профил, преку кои јавноста ќе може да се информира за неговите официјални активности.

Останува да видиме дали Попоски ќе остане на официјална страница што ќе ја уредува МНР или, пак, ќе тргне по стапките на неговиот претходник, Антонио Милошоски, кој беше секојдневно активен и преку личниот „Фејсбук“ профил. Министерот во заминување, Милошоски, преку личниот профил, кој е отворен за сите, се обидуваше да има еден понароден карактер со лични, поедноставни, неофицијални коментари за неговите министерски посети и средби, слики од официјални посети и лични патувања, преписки и коментари од граѓаните, како и личната исповед дека се повлекува од позицијата шеф на македонската дипломатија за да му се посвети на семејството. (Н.Р.)