Загина македонски работник во Ирак
Горан Адамовски
Дваесет и петгодишниот тетовец Мерсим Адеми го загуби животот во несреќен случај што се случил во средата во кампот на американската армија „Самерол“ во близина на градот Беџи, оддалечен околу 200 километри од Багдад. Адеми во Ирак заминал преку германската фирма „Еколог“, која има седиште во Тетово и која редовно испраќа наши државјани во Ирак. Телото на Адеми во четвртокот беше пренесено во земјава, а вчера беше погребано на градските гробишта во Тетово. Тој е осмиот македонски државјанин што загинал во Ирак или во Авганистан, каде што, исто така, работат голем број нашинци.
Според „Еколог“, Адеми загинал при несреќа крај станицата за гориво во кампот на американската војска. Тетовецот се здобил со тешки повреди, на кои им подлегнал по неколкучасовна битка на лекарите за неговиот живот. Причините за несреќата ги утврдува американската армија.
„Од наша страна веднаш беше формиран кризен тим, кој ги организираше и координираше сите активности за пренесување на починатиот во земјава. Откако се обезбедија сите потребни одобренија од воените власти, телото на нашиот ценет работник беше транспортирано во земјава и предадено на семејството“, се вели во дописот од тетовското претставништво на фирмата.
Во Министерство за надворешни работи се запознати со случајот, иако, поради познатата состојба во Ирак и лошите комуникации, официјална информација од тамошните власти немаат добиено.
Мерсим Адеми во Ирак работел од 2005 година. Неговите претпоставени велат дека тој бил еден од истакнатите и одговорните работници, за што често пати бил наградуван.
Официјална бројка колку македонски државјани работат во ризичните подрачја Ирак, Пакистан и во Авганистан - нема, но неофицијално, само во Ирак работат околу 1.500 нашинци. Министерството за надворешни работи во 2003 година издаде препорака со која им се советува на македонските граѓани, поради вкупната безбедносна состојба, да не патуваат во Ирак и во Авганистан . Но, оваа препорака ретко се почитува, оти поради добрата заработувачка, голем број граѓани се одлучуваат да заминат на повеќемесечна работа во ризичните земји.
А работата таму неколкупати се покажа кобна за македонските граѓани. Осум македонски граѓани во изминативе неколку години го загубија животот во Авганистан и во Ирак, додека тројца нашинци беа ослободени откако за нив беше платен откуп од неколку милиони долари
Преклани, четворица тетовци кои работеа за „Еколог“, беа убиени во близина на градот Кандахар. Авганистанската полиција ги пронајде телата на Сабид Тахири, Фадил Зенуни, Јорзам Фодани и Бесим Алиу по шестдневна потраг�� во планинскиот регион Мајванд. Тогаш Талибанците соопштија дека „четворицата странци биле убиени поради соработка со американските војници во Авганистан“. Претходно, тројца кумановци беа ликвидирани во Ирак. Далибор Лазаревски, Зоран Насковски и Драган Марковиќ, кои работеа за градежната компанија „Соуфан инженеринг“, беа киднапирани триесетина километри од Багдад, кога вооружена група го нападна нивното возило. Заложничката драма во Ирак ја преживеаја тројца тетовци, за кои беше платен откуп.
|
