Ватикан три години бележи минус

Ватикан веќе трета година бележи финансиска загуба. Светиот престол ја завршил 2009 година со дефицит од 4,1 милион евра, во споредба со загубата од 911.514 евра во 2008 година и девет милиони евра во 2007 година. Во 2009 година Ватикан имаше приходи од 250,2 милиони евра, а 254,3 милиони евра расходи. Меѓутоа, годишните донации од црквите низ цел свет, познати како годишен доброволен прилог од римокатолиците за трошоците на Светиот престол, беа зголемени за околу девет проценти во 2009 година и изнесуваа 82,52 милиони долари.

Повеќето трошоци на Ватикан се за покривање на активностите на папата Бенедикт Шеснаесетти и на службите, како што е Ватиканското радио, чија програма се емитува на пет континенти, на 40 различни јазици. Се додава и дека се направени скапи усовршувања на телекомуникацискиот систем, а реставрирањето на културните богатства и осигурувањето на безбедноста, исто така, се додаваат на сметката. (Би-Би-Си)