Претходен број

Дилема - Тачи или Ахмети во владата?

Груевски има 20 дена за составување на новата влада

Светлана Унковска

Непосредно по официјалното добивање на мандатот од претседателот Бранко Црвенковски, вчера мандатарот Никола Груевски ги започна разговорите со двете партии на Албанците - ДПА и ДУИ, за состав на новата влада. По средбата со претседателот Црвенковски, Груевски со мандатот в рака рече дека веднаш ги започнува консултациите со лидерите на двете политички партии од албанскиот блок, затоа што сакал што поскоро да го состави идниот владин кабинет.

„Сега имам 20 дена за составување на новата влада, но би сакал тоа да биде во најскоро време, затоа што не' очекува многу работа, остварување многу проекти, многу труд, енергија и натамошни успеси“, истакна Груевски по добивањето на мандатот од Црвенковски, по што замина на тет-а-тет средби со лидерите на ДПА и на ДУИ, Мендух Тачи и Али Ахмети. По првичната средба, Тачи излезе со извесна доза на оптимизам, додека Ахмети одлучи да ги избегне новинарите, а од ДУИ најавија дека за исходот од средбата на нивниот лидер ќе испрателе соопштение во текот на денот.

Тачи, по едночасовната разговори со Груевски, не сакаше да прецизира дали оваа средба со мандатарот значи и понуда за учество во владиниот кабинет, туку рече дека со ова само биле започнати разговорите. Тачи и Груевски вчера ги отвориле прашањата за кои веќе имале согласност, но за другите отворени точки ќе продолжат со средби и деновиве, а дополнително на нив ќе работеле и комисии на ВМРО-ДПМНЕ и на ДПА.

„Интегративните процеси во НАТО и во ЕУ се темите за кои имаме целосна согласност со Груевски, исто така, и околу прашањето за спорот со Грција имаме став дека треба да се направи се' за да се дојде до решение, кое не смее да засега во идентитетот на македонскиот народ. Мојот личен став и ставот на ДПА околу ова прашање е непроменет и мислам дека секој што бара да се промени идентитетот на една нација влегува во стара политика“, истакна Тачи. Тој за враќањето на ДПА во парламентот рече дека ќе зависи од тоа дали пр��тседателот на ДИК, Јован Јосифовски, ќе поднесе оставка. Тачи, кој за ова разговарал и со Груевски, очекува дека Јосифовски ќе се најде пред органите на правдата како директно одговорен затоа што, како што рече, е одговорен за поништените гласови на ДПА на 85 проценти од избирачките места. Тој не прецизираше и дали во идниот владин кабинет би прифатиле заеднички настап со ривалската ДУИ, туку оставаат таквата одлука да ја донесе мандатарот Груевски, а тие дури потоа ќе одлучеле дали ќе се согласат да седат заедно во иста влада со партијата на Ахмети, која ја нарече „криминализирана структура“.

Средбата, пак, на Ахмети со Груевски, која траеше малку повеќе од очекуваното, заврши без изјава на првиот човек на интегративците. Од ДУИ најавија дека за разговорите на нивниот лидер со мандатарот ќе информираат со соопштение. Инаку, Ахмети вчера во интервју за албанскиот весник „Стандард“ изјави дека е убеден оти со победата на изборите ќе биде дел од новата македонска влада.

„Се случија многу доцнења и грешки, затоа ниту сакам да помислам дека ќе се повтори 2006 година кога не се почитуваше волјата на мнозинството од албанскиот електорат“, истакнал Ахмети. Тој минатата недела предизвика серија реакции во јавноста кога за грчкиот весник „Та неа“ изјавил дека „решението на спорот за името треба да одговара на мултиетничкиот карактер на државава, да ги има предвид и идентитетот на граѓаните и историските и географските чувства на нашите јужни соседи“.

Владиниот портпартол Ивица Боцевски вчера пренесе дека Груевски покрај со ДПА и со ДУИ разговорите ќе ги прошири и со лидерот на ПЕИ, Фијат Цаноски.