Се бара долар повеќе во менувачниците

По падот на еврото, македонските граѓани се' ��овеќе купуваат долари, кои вчера се продаваа по 50,8 денари

Соња Маџовска

Се бара долар повеќе на менувачкиот пазар во земјава. По падот на еврото, македонските граѓани се' повеќе купуваат американски долари. Од менувачниците велат дека секој ден се менува вредноста на доларот. Вчера тој се продаваше по 50,8 денари, а се купуваше по 50,3 денари. На веб-страницата на Народна банка на Македонија е наведено дека средниот курс на американскиот долар вчера изнесувал 49,22 денари.

„Се бара американски долар повеќе од евро. Има недостиг на долари на менувачкиот пазар. Пред само неколку дена можевме да ги сервисираме банките и им продававме долари, но повеќе не сме во можност. На банките веќе не им продаваме долари, зошто и ние немаме. Очекуваме и натаму да расте побарувачката за долари. Ако оваа тенденција продолжи НБМ ќе мора да интервенира, за да не дојде до пад на вредноста на еврото на менувачкиот пазар“, вели Ангеле Миновски од Здружението на приватни менувачници.

Но, тој потврдува дека последниве денови е зголемена побарувачката за долари, но не дека граѓаните ги менуваат еврата во долари, туку денарите, место во евра како досега, ги претвораат во долари. Вредноста на доларот последниве месеци постојано се зголемува. Само за споредба, еден долар во јануари се продаваше по 42,5 денари.

Највисока вредност доларот имаше пред 10 години. Тогаш во земјава соодносот беше 2 спрема 1 во корист на доларот.

Од менувачниците прогнозираат дека сега може да дојде до изедначување на вредноста на еврото и на доларот. Од централната банка вчера ништо не сакаа да изјават за случувањата на менувачкиот пазар. Оттаму само објаснија дека тие интервенираат на пазарот преку банките и тоа само со евра.

Банкарите уверуваат дека штедачите не ги конвертираат своите заштеди од евра во други валути и покрај падот на еврото. „Во НЛБ Тутунска банка се' уште не се чувствува конвертир��ње на заштедите од евра во други валути или во денари. Една од причините за тоа е што во согласност со политиката на НБМ еврото има стабилен курс во однос на денарот. Не верувам дека, доколку остане оваа политика, ќе има позначајни движења во смисла на промена во други валути“, изјави Јанчевски. Тој смета дека еврото малку побрзо паѓа од проекциите што ги правеа светските аналитичари за неговиот пад. „Последните анализи укажуваа дека еврото ќе падне до 1,22 во однос на доларот и оти во наредниот период ќе се движи од 1,22 до 1,30. Сигурно е дека и аналитичарите не можат да ги погодат сите движења, затоа што она што се случуваше во соседна Грција укажува дека може да има и некои непредвидени движења и еврото да оди и подолу од проекциите“, вели Јанчевски.

И експертите сметаат дека има опасност еврото уште да паѓа. „Поради целата оваа ситуација паѓа вредноста на еврото. И натаму ќе паѓа, до јули не се очекува друг тек на настаните. Од друга страна, расте цената на златото. На сите страни се бара злато. Се' уште е рано да се зборува за закрепнување на светската економија, а ние тоа го чекаме, за да се зголеми побарувачката и за македонските производи“, вели професорот Мирољуб Шукаров. Професорот Јован Пејковски смета дека кога ќе се стабилизира Грција, ќе се стабилизира и еврото.

Инаку, еврото вчера го допре дното. Неговата вредност вчера падна на најниско ниво во изминативе четири години, достигнувајќи ниво од 1,2237 долари. Аналитичарите тврдат дека намалувањето на вредноста на еврото единствено може да се запре со економски раст на целата еврозона. А само пред една седмица, ЕУ и ММФ се договорија со пакет тежок 750 милијарди евра да го спречат ширењето на должничката криза од Грција кон другите слаби економии во еврозоната. Наспроти еуфоријата со која беше дочекан пакетот, стравувањата се вратија и европските акции и еврото почнаа повторно да паѓаат. „По краткото затишје од минатата седмица со донесениот европски спасувачки план, вреден речиси 750 милијарди евра, стравот повторно се надвисна врз финансиските пазари, овој пат поради опасностите за најголемите банки на стариот континент, кои се исправени пред проблемите што ќе ги осакатат европските економии“, пишува весникот „Њујорк тајмс“. Весникот забележува дека инвеститорите се откажуваат од европската валута во корист на златото и другите валути, кои се третираат како понадежни.