Дебарско Езеро се полни со смет

Големи количини ѓубре има на местата каде што се влеваат реките Радика и Црн Дрим

ДЕБАР - Реките Радика и Црн Дрим деновиве имаат неколку пати поголем доток поради поројните дождови, а истовремено со тоа се внесуваат и големи количини смет во Дебарско Езеро. Особено многу ѓубре има собрано на местото каде што Радика се влева во езерото, кај Косоврашки мост па се' до Мелнички мост, но воопшто не подобра состојбата ниту на вливот на Црн Дрим, во близина на месноста Три Чешми.

Во близина на Косоврашки Бањи веќе се формирани цели острови од смет. Сопственикот на АД „Дебарски бањи - Цапа“, Меџит Цапа, побара од надлежните институции да преземаат мерки за запирање на оваа појава што му создава проблеми и на бањскиот туризам.

Вчера реагираа и еколошките друштва „,Радички бисери“ од Косоврасти и „Дешат“ од Дебар. Тие бараат да се преземаат итни мерки за да се запре внесувањето на сметот преку Радика во Дебарско Езеро. Се бара што побрза реализација на големиот еколошки проект „За чиста Радика“, кој го финансира италијанската влада, а чија главна цел е изградба на пречистителни станици кај селата по должината на Радика, кои треба да спречат сметот од дивите депонии да завршува во реката, а потоа и во Дебарското Езеро. Проектот за долината на Радика чини 6,8 милиони евра, но неговата реализација доцни поради проблемите со депонијата во Центар Жупа на чија изградба се спротивставува месното население, како и поради проблемите со земјиштата крај некои рекански села каде што треба да се градат колектори. (К.М.)