Вардар го загадува Солунскиот Залив

Нова демократија бара од грчкото Министерство за животна средина да преземе мерки во соработка со македонското за да се прекине загадувањето на реката Вардар од македонска страна. Пратеникот на Нова демократија, Тодорос Караоглу, упати писмо до грчката министерка за животна средина, Тина Бирбили, во која посочува дека во делот на Вардар меѓу Македонија и Грција постојано се забележуваат огромни количини пластични шишиња, кеси со отпад и дрва. Според неговото писмо, етикетите напишани на кирилица се индикатор од каде доаѓа целото ѓубре во реката.

Караоглу нагласува дека покрај загадувањето на реката, загрижувачки е и фактот дека ова ѓубре преку струење на водата се пренесува во Солунскиот Залив и стига и во туристичките места во Пиерија, како што се Лептокарија, Неи Пори, Платамона, Паралија, Литохоро.

„Проблемот не е важен само од естетски аспект или од аспект на заштита на животната средина. Имено, групирањето на отпадот во реката доведува до зголемување на поплавите во нивите што се наоѓаат покрај реката и константно уништување на многу земјоделски култури“, забележува пратеникот на Нова демократија, додавајќи де��а земјоделците и жителите во делот покрај Вардар во Грција се фрустрирани од она што им се случува секојдневно. (М.П.)