Се отвора канцеларијата во Брисел

Градот Скопје и ЗЕЛС в четврток ќе отворат заедничка канцеларија во Брисел заради подобро претставување на своите интереси. Како што информира претседателот на ЗЕЛС и градоначалник на Скопје, Коце Трајановски, одлуката за отворање на канцеларијата била донесена на Управниот одбор на ЗЕЛС, а трошоците за нејзиното работење заеднички ќе ги делат ЗЕЛС и Градот.

„Целта на работењето на канцеларијата е лобирање за отворање фондови за локалната власт од Македонија и подобар пристап до европските фондови, како и презентирање на програмите и проектите на единиците на локалната самоуправа на Македонија и на Град Скопје во Брисел“, рече Трајановски на вчерашната прес-конференција, истакнувајќи дека Градот размислува и за самостојно претставување во Брисел.

Канцеларијата се наоѓа во зградата на Советот на европски општини и региони (ЦЕМР), каде што членува ЗЕЛС од 2004 година. Зградата е во близина на Европскиот парламент.

ЗЕЛС е втора институција од регионот, по Бугарската асоцијација на локални власти, која отвора своја канцеларија во Брисел. Од градовите во регионот, своја канцеларија во Брисел имаат Сареаво и Загреб. (С.Р.)