И в година концерти во руинирана Универзална сала

Наместо нова и престижна за одржување културни манифестации, Универзална сала и идната година ќе остане руинирана иако дури пред две години и премиерот Никола Груевски најави нејзина обнова. Градоначалникот Коце Трајановски вчера информираше оти е неизвесно дали во градскиот буџет за 2011 година ќе се издвојат пари за реализација на проектот тежок речиси 6 милиони евра. Иако главен финансиер е Министерството за култура, свој финансиски удел треба да има и Градот како основач на објектот.

„Ова е доста голем и скап проект. Не е сигурно дали во буџетот за 2011 година ќе има издвоено средства за оваа намена, но сигурно дека тоа ќе го сториме во буџетот за 2012 година“, изјави вчера Трајановски давајќи до знаење дека реконструкцијата на Универзалната сала се' уште е на стенд бај. Тоа неодамна го потврдија и од Министерството за култура од каде што објаснија дека проектот се одложува се' додека не се изготват и проектите за сценската технологија, озвучувањето и други технички неопходни детали. Досега, две години откако се најави обновата на салата, направен е архитектонскиот проект, но без потребните придружни проектни решенија.

Инаку, предвидено е салата да добие нова фасада, надворешна галерија на вториот кат, подземно паркиралиште, проширен влез... (Дс.Т.)