Претходен број

Поглед

Кампањата почна

Билјана Ангеловска

Централната власт стартуваше со кампањата за локални избори. И тоа директно во Скопје. Почна отворено да се меша во работата на градоначалникот. Преку својот човек од градската администрација, Владата ги ангажираше скопските јавни претпријатија да се вклучат во акцијата за чистење на коритото на Вардар. Чистењето на Вардар, секако, е потег за поздравување. Но, притоа Владата „заборави“ да го извести Трифун Костовски дека ќе го чисти Вардар во Скопје со помош на градските претпријатија. Тоа го навреди градоначалникот.

Костовски нема право да се лути ако некој сака да помогне градот да биде поубав и почист. Но, секако, треба да реагира кога некој прави нешто во „неговиот двор“, без тој претходно да биде запознат за тоа. Едно е каков градоначалник е Костовски и што направи тој за овие три години. Тоа го гледаат и го оценуваат граѓаните. Но, сосем друго е што и колку можеше да направи, со оглед на ингеренциите што ги има.

Намерно, или не, факт е дека тој е оставен надвор од оваа благородна акција, наместо таа да биде спроведена со заеднички сили. Дали е грешката во комуникацијата или, пак, свесно е прескокнат и контактите се правени директно со неговите потчинети, сега веќе и не е толку важно. Јасно е само дека на Костовски ќе му биде се' потешко успешно да го истера до крај градоначалничкиот мандат. По ова и по поведената постапка пред Уставен суд за измените на ДУП „Мал ринг“, со што тој отворено и' се спротивстави на Владата да гради црква на плоштадот, Костовски во иднина ќе мора да смета само на својот инстинкт за бизнис, доколку сака да стори нешто повеќе за граѓаните. Од Владата, најверојатно, ќе добива само нови сопки. Таа сигурно ќе инвестира во свои проекти и ќе реализира свои идеи. Изборите треба да се добијат.