Да се заколe „овцата на Миле”!
Васко Костески, Битола
Уставниот суд на Македонија реши, а во меѓувреме нека размислат медиумите дали ќе го емитуваат спотот со овцата на Миле. Некој од патроните и старателите на уставните судии може да се сети и за овој спот да поведе иницијатива. Итно да се стопира, без малку десетгодишната кампања „Купувајте македонски производи”. Веднаш од домашните, македонски производи да се симнат етикетите со „македонското сонце”. Владата веднаш да почне постапка за укинување на акцизите и царините на увозните стоки.
Со сите погоре спомнати акции и инструменти, според логичката матрица на судиите во Уставниот суд, се нарушува пазарната конкуренција, затоа и ги укинаа “патриотските сметки”.
Тоа што ете и Ирска имала патриотски сметки, тоа што во ЕУ да влезе стока однадвор е вистинско чудо, тоа што САД и Франција водат вечна битка за своите производи и пазари, нашиве уставни судии воопшто не ги доведува во дилема. Од воведувањето на патриотските сметки еве, сведоци сме, дека се случи крах на Волстрит, распад на финансискиот систем во светски размери и најголемата планетарна економска криза. За среќа, тука е Уставниот суд на Македонија кој ќе ги отстрани катастрофалните причини за светската криза, па Волстрит, Светска банка, ММФ, Светската трговска организација можат да здивнат. |
