Пензионерското бесплатно возење кошмар за вработените

Има предлози да им се овозможи бесплатен превоз секој ден во одреден термин

Снежана Калабакова


Петок во автобус на ЈСП. Слободно возење за пензионерите, кошмар за вработените граѓани. Баби и дедовци со бастунчиња во треперливите раце едвај се качуваат во градските автобуси додека зад нив се туркаат ученици со ранци на грбот. Воздржано нервозни поради долгото стоење на постојките, влегуваат и оние што треба навреме да стигнат на работа. Но, има и такви кои не го кријат револтот од големите турканици што се создаваат секој петок во автобусите на ЈСП. Во последниот работен ден во неделата студентите брзаат на предавања, вработените на работа, а пензионерите ја користат привилегијата за бесплатен превоз за да стигнат до институциите, болниците, продавниците, пазарите или да ги чуваат внуците.

„Стана невозможно да се оди на работа во петоците, бидејќи од пензионерите е тешко да се влезе во автобус на ЈСП. Немам воопшто против бесплатно да го користат градскиот превоз, но мора надлежните да најдат начин да не биде тоа на штета на другите патници. Или нека им дозволат без пари да се возат секој ден, но во одреден временски термин, што ќе придонесе, секако, да се намали притисокот што се прави во петок или нека биде тоа во време на викенди, кога вработените не користат автобус“, револтирано вели една скопјанка.

Мажите постари од 64 години, а жените што имаат наполнето 62 години секој петок се тискаат заедно со останатите граѓани, а евидентно е дека бројот на автобуси е ист како и во секој друг работен ден. Тоа го потврдуваат и од ЈСП, објаснувајќи дека не се во ситуација да преземат нешто конкретно за да ја подобрат состојбата, бидејќи не можат да обезбедат плус автобуси од оние што им се на располагање.

Ист број автобуси, а зголемен број патници има само во петок, а тогаш мака мачат сите што се превезуваат со нив. Метежот им го комплицира животот на сите граѓани во Скопје, па голем дел од нив размислуваат и даваат предлози за негово растоварување. Додека едни прашуваат зошто градските власти и ЈСП не им овозможат бесплатен превоз на пензионерите секој работен ден во неделата, други предлагаат бесплатно возење за пензионери да се дозволи плус и во сабота и во недела.

„Свесни сме дека во петоците имаме проблем со турканиците. На тоа се жалат и возачите кои навистина во тешки услови си ја вршат работата. На оваа тема имавме повеќе разговори со надлежните во Градот, во смисла на тоа дали освен во петок, да се овозможи бесплатно возење и во некој друг делничен ден. Од советничката група на СДСМ имаше предлог пензионерите да се возат во период од 9 до 15 часот, кога вработените веќе се заминати на работа и пред да им заврши работното време, со цел да се намалат тисканиците, или евентуално освен во петок, уште и во сабота и во недела. Предлозите се разгледуваат и наскоро ќе излеземе со конечно решение“, вели Мишо Николов, директор на ЈСП „Скопје“.

Од Одделението за односи со јавноста велат дека Градот моментно не размислува да го смени терминот за бесплатен превоз на пензионерите. „Неработните денови не може да бидат алтернатива за петок, затоа што и оваа категорија граѓани имаат потреба да завршат некои обврски и во работните денови“, велат од Град Скопје.