Родителите ги воспитуваат децата со ќотек

Загрижувачки резултати од истражување врз 1.277 лица на возраст од 18 до 23 години

Седум од десет деца во земјава добиваат ќотек од своите родители како воспитна мерка, а голем дел од нив се и физички и емоционално злоупотребени. Ова се загрижувачките резултати на истражувањето спроведено на 1.277 лица на возраст од 18 до 23 години, што вчера беа презентирани на работниот состанок за превенција на злоупотреба на децата и запоставување.

Од ќотекот секој десетти испитаник имал видливи траги и повреди. Околу 42 процента од децата се изјасниле дека биле пцуени, навредувани, понижувани или родителите им се заканувале со тепање. Застапена е и сексу��лната злоупотреба на децата, и тоа преку сексуален однос или допирање на телото на возрасниот или на детето.

Д-р Марија Ралева од Клиниката за психијатрија, која е национален соработник за превенција на насилство, смета дека овие податоци можат да варираат, но, сепак, треба да се земат како водич во преземањето на натамошните активности, пред се', за превенирање на ваквите случувања. „Негативните искуства во детството, доживеаните злоупотреби, запоставувања и малтретирања се одразуваат и на физичкото и на менталното здравје на децата“, вели д-р Ралева.

Според неа, постои нагласена поврзаност меѓу злоупотребувањето на децата и подоцнежни манифестации на пушење, злоупотреба на алкохол и дроги, депресија, самоубиства, а оти како возрасни, децата жртви на злоупотреба веројатно можат да развијат срцеви болести, рак, мозочен удар, дијабетес и воопшто нарушено здравје.

Регионалниот претставник на СЗО за Европа, Динеш Сети, смета дека едукација, намалување на достапноста на алкохолот, промена на нормите поврзани со злоупотребата на децата, посети на домовите, обучување родители, како и намалување на несакани бремености, се најдобри превентивни мерки за насилството врз децата.

„За добра превенција е потребен мултисекторски одговор во кој ќе бидат вклучени и здравствениот сектор, ресорот правда, социјалниот сектор и образованието“, рече Сети.

Заменик-министерот за труд и социјална политика, Спиро Ристовски, нагласи дека Владата сериозно се занимава со ова прашање, најавувајќи формирање Национално координативно тело. (Х.Р.)