Плоштадот „Скендер-бег“ ќе има 20.000 квадрати

Општина Чаир нема пари за изградба на плоштадот, па ќе бара од Владата

„По многубројните идејни проекти на Владата и на Општина Чаир за ревитализација на Старата чаршија, сега е време за еден мегапроект каков што ќе биде плоштадот ’Скендер-бег‘. Тој треба да и' даде ново значење на чаршијата, бидејќи таа ќе добие 20.000 квадрати плоштад што ќе го користат граѓаните, уметниците, граѓанските здруженија“, рече вчера градоначалникот на Чаир, Изет Меџити, на визуелната презентација на идејното решение на проектот за новиот плоштад. Истовремено ја отвори јавната дебата, во која, како што рече, можат да се вклучат сите архитекти, медиуми, јавни личности, граѓани чии прифатливи идеи ќе бидат вградени во главниот проект.

Плоштадот ќе се гради по идејното решение на проектантската куќа „Инженеринг архинггруп“ од Тетово. Тоа нуди две варијанти. Едната во опсег на границите на општината Чаир, при што плоштадската површина ќе допира до стоковната куќа „Мост“. Дуќаните кои се на потегот, а се привремени објекти, ќе влезат во безистенско решение, поради кое плоштадот ќе добие одредена нивелација кон споменикот на Скендер-бег и голема градска тереса над самиот безистен. Постојниот паркинг пред стоковната „Илинден“ за 360 возила ќе биде решен со подземно ��аркирање.

Со втората варијанта, плоштадот се проширува и добива дополнителна површина која ги поминува границите на општината Чаир и влегува во јадрото на слободниот простор помеѓу МНТ и Филхармонијата, што е површина на општината Центар. Овој дел од плоштадот со останатиот ќе се поврзе со премостување на булеварот „Гоце Делчев“.

Засега Чаир нема пресметка за тоа колку ќе чини плоштадот, но е познато дека пари за негова изградба ќе се бараат од Владата. (Сн.К.)