Антикорупциска ќе гони шестмина функционери

Антикорупциска поднела четири иницијативи за поведување постапка за кривично гонење на функционери, соопшти претседателот на комисијата, Илми Селами. Поради сомневање за злоупотреба на службената должност и овластување, иницијатива е поднесена против Весна Мираковска, деканка на Техничкиот факултет во Битола. За неа се предлага и разрешување од функцијата поради нерегуларно работење.

Иста судбина ги снајде и Бошко Нелковски, поранешен директор на Националната агенција за европски образовни програми и мобилност, како и Бранислав Митиќ, Марјан Крстевски и Идриз Зека - сите поранешни директори на ЈП за одржување и заштита на магистралните и регионалните патишта „Македонија пат“ Скопје и Хасип Јусуфи, поранешен директор на ЈП за комунални дејности „Комуналец“ Гостивар. Во однос на спроведувањето на Законот за спречување судир на интереси, Антикорупциска изрече три јавни опомени за функционери, кои не сакале да се откажат од вршење две функции истовремено. (П.К.)