А1 ќе собира потписи за поддршка

На телевизијата се врти спот што завршува со апел за помош

Полиција околу А1 телевизија, а на црн екран пишува „напад“. Инспекциите вршат увид во фирмите лоцирани на „Перо Наков“ во Маџари, полицијата асистира, а на празниот екран се појавува „упад“. Надлежните ги вадат документите што ги заплениле во десетиците компании што се поврзуваат со газдата Велија Рамковски, по што на екранот стои „грабеж“. Сопственикот на телевизијата со лисици на рацете го носат на распит пред истражен судија, тој извикнува „ова е демократијата на Груевски“, а на екранот се појавува зборот „линч“. „Сега на А1 и' е потребна вашата помош“, поентира на крајот скопската телевизија.

Вака парафразирано и скратено изгледа спотот што веќе неколку дена се врти на А1 телевизија, во која овој медиум апелира за поддршка од граѓаните. За некого тажно, за други недолично, за трети оправдано, за четврти непотребно... Но, спотот предизвика внимание во јавноста.

Главниот и одговорен уредник на телевизијата, Младен Чадиковски, вели дека преку овој спот тие бараат поддршка од јавноста, но, пред се', од граѓаните.

„Во наредниот период во план не е да почнеме со собирање потписи за поддршка на А1 телевизија, на демократијата, односно за подобрување на медиумската слика во земјава“, вели Чадиковски.

Како што велат од А1, спотот го изработиле самите и тој „веројатно, ќе продолжи да се емитува и следните денови“.

Во Здружението на новинари велат дека А1 телевизија досега „ниту формално ниту неформално“ не побарала никаква помош од нив.

„Ние сме апсолутно подготвени да ги заштитиме колегите“, вели претседателот на ЗНМ, Насер Селмани.

Од ЗНМ веќе неколку дена бараат начин да воспостават контакт со уредувачкиот тим на А1.

„Прво сакаме да дискутираме, да видиме со какви проблеми или притисоци се соочуваат, а потоа да им помогнеме колку што можеме“, уверува Селмани. (Г.А.)